पुणे : शहरात महिलांवरील आणि अल्पवयीन मुलींवरील गुन्ह्यांची मालिका थांबण्याचे नाव घेत नाही. एका दिवसात चार अल्पवयीन मुली बेपत्ता झाल्याच्या घटनांनी शहर हादरले असून, याचवेळी विवाहित महिलांवरील छळ आणि अत्याचाराच्या गंभीर घटनाही समोर आल्याने नागरिकांमध्ये भीतीचे वातावरण निर्माण झाले आहे.
विश्रांतवाडी परिसरातून १५ वर्षीय मुलीला अज्ञात व्यक्तीने आमिष दाखवून पळवून नेल्याची घटना घडली. त्याचप्रमाणे फुरसुंगी भागात १७ व १६ वर्षांच्या दोन मुलींना फूस लावून बेपत्ता करण्यात आले. तसेच काळेपडळ परिसरातून आणखी एका १७ वर्षीय मुलीचा ठावठिकाणा लागलेला नाही. या सलग घटनांमुळे पालकवर्गात चिंतेचे वातावरण आहे.
दरम्यान, हडपसर भागात एका २५ वर्षीय विवाहितेवर सासरच्या मंडळींकडून अमानुष छळ केल्याचा धक्कादायक प्रकार उघडकीस आला आहे. तिला मारहाण करत मानसिक त्रास देण्यात आला. तिच्या इच्छेविरुद्ध गर्भपाताच्या गोळ्या देऊन गर्भपात घडवून आणल्याचा आरोप असून, तिच्या खासगी आयुष्यावर नजर ठेवण्यासाठी खोलीत निरीक्षण यंत्रणा बसवण्यात आल्याचेही समोर आले आहे. या प्रकरणी पतीसह पाच जणांविरुद्ध गुन्हा दाखल करण्यात आला आहे.
तसेच, एका ३१ वर्षीय महिलेला पती व सासूकडून मारहाण व अपमानास्पद वागणूक दिल्याची घटना समोर आली. याप्रकरणी तक्रार दाखल झाल्यानंतर संबंधितांवर गुन्हा नोंदवण्यात आला आहे.
याशिवाय, मांजरी परिसरात १९ वर्षीय विवाहितेशी गैरवर्तन करून तिचा विनयभंग केल्याचा प्रकार उघड झाला असून पोलिसांनी तपास सुरू केला आहे.
सलग घडणाऱ्या या घटनांमुळे पुण्यात महिलांच्या सुरक्षेचा प्रश्न पुन्हा एकदा ऐरणीवर आला आहे. नागरिकांकडून कठोर कारवाईची मागणी होत असून, पोलिस प्रशासनाने तातडीने ठोस उपाययोजना करण्याची गरज व्यक्त केली जात आहे.