बारामती : राज्यातील बारामती आणि राहुरी विधानसभा मतदारसंघांतील पोटनिवडणुकांसाठी आज सकाळपासून मतदानाची प्रक्रिया सुरू झाली. सकाळी ७ वाजता मतदानाला सुरुवात झाली असून सायंकाळी ६ वाजेपर्यंत मतदारांना मतदानाचा हक्क बजावता येणार आहे. या निवडणुकांचे निकाल राज्याच्या पुढील राजकीय समीकरणांवर परिणाम करणारे ठरणार आहेत.
बारामती मतदारसंघात विशेष भावनिक वातावरण पाहायला मिळत आहे. माजी उपमुख्यमंत्री अजित पवार यांच्या निधनामुळे रिक्त झालेल्या या जागेसाठी पोटनिवडणूक होत असून, त्यांच्या पत्नी सुनेत्रा पवार या उमेदवार म्हणून रिंगणात आहेत. त्यांनी आज सकाळी मतदान करत आपला हक्क बजावला.
मतदानापूर्वी सुनेत्रा पवार यांनी विद्या प्रतिष्ठान परिसरात जाऊन अजित पवार यांना आदरांजली अर्पण केली. त्यानंतर माध्यमांशी संवाद साधताना त्या म्हणाल्या की, बारामतीकर मोठ्या संख्येने मतदानासाठी बाहेर पडत आहेत आणि ही निवडणूक केवळ राजकीय नसून ‘दादा’ना श्रद्धांजली अर्पण करण्याचा मार्ग ठरत आहे.
त्या पुढे म्हणाल्या की, बारामतीकरांनी गेल्या अनेक दशकांपासून पवार कुटुंबाला दिलेला पाठिंबा कायम ठेवला आहे. आजही सर्वांना अजित पवार यांची उणीव तीव्रतेने जाणवत आहे, असे भावनिक शब्दांत त्यांनी व्यक्त केले.