यवतमाळ : यवतमाळ जिल्ह्यातील राळेगाव तालुक्यातून गेल्या सहा महिन्यांत ३४ आदिवासी मुली बेपत्ता झाल्याची गंभीर बाब समोर आली आहे. या घटनेमुळे परिसरात भीतीचे आणि चिंतेचे वातावरण निर्माण झाले असून, प्रकरण अधिकच गुंतागुंतीचे बनत आहे.
या पार्श्वभूमीवर भाजपचे जिल्हाध्यक्ष प्रफुल चव्हाण यांनी या प्रकरणात मानवी तस्करीचा संशय व्यक्त केला आहे. काही ऑडिओ क्लिप्समध्ये मुलींना फसवण्याच्या पद्धतींचा उल्लेख असल्याचा दावा त्यांनी केला असून, संपूर्ण प्रकरणाची सखोल चौकशी व्हावी, अशी मागणी पुढे आली आहे.
दरम्यान, पोलिसांच्या भूमिकेबाबतही प्रश्न उपस्थित होत आहेत. या प्रकरणातील मुख्य संशयित मजहर कुरेशी याला यापूर्वी ताब्यात घेऊन सोडण्यात आल्याचा आरोप करण्यात आला आहे. त्यानंतर तो तेलंगणा येथे पसार होण्याच्या तयारीत होता, मात्र नंतर पोलिसांनी त्याला पुन्हा अटक केल्याची माहिती समोर आली आहे.
या प्रकरणात “लव्ह जिहाद” आणि धर्मांतरणाचा अँगलही असू शकतो, अशी शक्यता व्यक्त केली जात असून, मुलींना व त्यांच्या कुटुंबियांना आर्थिक आमिष दाखवून जाळ्यात ओढले जात असल्याचेही आरोप होत आहेत. त्यामुळे या संपूर्ण प्रकरणाची व्याप्ती अधिक गंभीर होत चालली आहे.
दरम्यान, या घटनेची माहिती राज्य सरकारपर्यंत पोहोचली असून, निष्पक्ष आणि सखोल तपासाची मागणी वाढत आहे. बेपत्ता मुलींचा लवकरात लवकर शोध लागतो का आणि या मागचे सत्य काय आहे, याकडे संपूर्ण राज्याचे लक्ष लागले आहे.