नागपूर : सोशल मीडियाच्या माध्यमातून भडकाऊ आणि वादग्रस्त मजकूर प्रसारित करत केंद्रीय मंत्री नितीन गडकरी यांना जीवे मारण्याची धमकी दिल्याचा प्रकार समोर आला आहे. या घटनेमुळे शहरात खळबळ उडाली असून धंतोली पोलिसांनी तातडीने कारवाई करत आरोपीला अटक केली आहे.
पोलिसांच्या माहितीनुसार, एका फेसबुक खात्यावरून अपलोड करण्यात आलेल्या व्हिडिओमध्ये संबंधित व्यक्तीने नितीन गडकरी आणि त्यांच्या कुटुंबीयांविरोधात अपमानास्पद भाषा वापरली. याशिवाय दुसऱ्या व्हिडिओद्वारे दोन समाजांमध्ये द्वेष निर्माण होईल असा मजकूर प्रसारित केल्याचा आरोप आहे. त्यामुळे शहरातील सामाजिक सलोखा बिघडवण्याचा प्रयत्न झाल्याचे स्पष्ट होत आहे.
या प्रकरणी अखिल भारत हिंदू महासभेचे राष्ट्रीय अध्यक्ष सुमित कुमार चौहान यांनी तक्रार नोंदवली. त्यांनी ४ एप्रिल रोजी नागपूरात असताना फेसबुक आणि इंस्टाग्रामवर हे व्हिडिओ पाहिल्यानंतर तात्काळ धंतोली पोलिस ठाण्यात धाव घेतली.
तक्रारीनंतर पोलिसांनी तपासाची चक्रे फिरवत आरोपी आयुष अग्रवाल याची ओळख पटवली आणि त्याला ताब्यात घेतले. तो हुडकेश्वर परिसरातील महालक्ष्मी नगरचा रहिवासी असल्याची माहिती पुढे आली आहे.
या प्रकरणात आरोपीविरोधात धमकी देणे, अपमानास्पद वक्तव्ये करणे, समाजात तेढ निर्माण करणे आणि शांतता भंग करण्याचा प्रयत्न करणे अशा विविध गंभीर गुन्ह्यांखाली गुन्हा दाखल करण्यात आला असून पुढील तपास सुरू आहे.