पुणे : शहरात महिला पत्रकाराच्या सन्मानाला धक्का देणारी संतापजनक घटना समोर आली आहे. वार्तांकनासाठी गेलेल्या महिला पत्रकाराशी गैरवर्तन करत अर्वाच्य भाषेत शिवीगाळ केल्याप्रकरणी एका रील स्टारविरोधात पर्वती पोलिस ठाण्यात गुन्हा दाखल करण्यात आला आहे.
ही घटना सोमवारी (३० मार्च) टिळक रस्त्यावर घडली. संतोष पंडित असे आरोपीचे नाव असून, तो सोशल मीडियावर सक्रिय असल्याचे समोर आले आहे.
पोलिसांनी दिलेल्या माहितीनुसार, नाशिकमधील भोंदू बाबा अशोक खरात प्रकरणाच्या निषेधार्थ काही महिलांनी टिळक रस्त्यावरील महाविद्यालयाजवळ आंदोलन छेडले होते. या आंदोलनामुळे वाहतूक कोंडी होत असल्याचे कारण देत संतोष पंडित घटनास्थळी आला.
दरम्यान, आंदोलनाचे वार्तांकन करत असलेल्या महिला पत्रकाराला त्याने लक्ष्य केले. तिच्याशी अयोग्य वर्तन करत तिच्यावर अश्लील आणि खालच्या दर्जाच्या टिप्पणी केल्या. इतकेच नव्हे, तर तिच्या परवानगीशिवाय मोबाईलवर तिचे चित्रीकरणही केल्याचे तक्रारीत नमूद आहे.
या प्रकारानंतर संबंधित पत्रकाराने पर्वती पोलिस ठाण्यात धाव घेत तक्रार नोंदवली. पोलिसांनी तत्काळ दखल घेत संतोष पंडितविरोधात गुन्हा दाखल केला असून पुढील तपास सुरू आहे.