नागपूर - या वर्षीची मकर संक्रांत अत्यंत विशेष मानली जात आहे. अनेक वर्षांनंतर षटतिला एकादशी आणि मकर संक्रांत यांचा दुर्मीळ योग एकत्र आला असून, त्याचबरोबर सर्वार्थ सिद्धी योगाचाही लाभ या पर्वकाळाला मिळत आहे. सूर्य आणि शुक्राच्या युतीमुळे यंदाच्या मकर संक्रांतीचे धार्मिक व आध्यात्मिक महत्त्व अधिकच वाढले आहे. त्यामुळे या दिवशी करण्यात येणाऱ्या स्नान, दान आणि सूर्यपूजेला विशेष फलदायी मानले जाते.
मकर संक्रांतीच्या दिवशी सूर्यदेव मकर राशीत प्रवेश करतात. हा काळ पुण्यकाळ म्हणून ओळखला जातो. शास्त्रांनुसार या दिवशी केलेले स्नान आणि दान अनेक पटींनी पुण्य देणारे ठरते. यंदा स्नानासाठी सकाळी 05:27 ते 06:21 या वेळेत ब्रह्म मुहूर्त असून, या काळात स्नान करणे अत्यंत शुभ मानले जाते. याशिवाय संध्याकाळी 05:43 ते 06:10 या वेळेत गोधुली योग असून, या मुहूर्तात केलेले स्नानही पुण्यकारक असल्याचे सांगितले जाते.
मकर संक्रांतीच्या दिवशी पहाटे ब्रह्म मुहूर्तावर उठून स्नानाच्या पाण्यात गंगाजल मिसळून अंगस्नान करावे. स्नानानंतर गणेशाचे ध्यान करावे आणि मन शुद्ध करून सूर्यपूजेला प्रारंभ करावा. तांब्याच्या भांड्यात जल, लाल पुष्प, गूळ आणि काळे तीळ घेऊन सूर्याला अर्घ्य अर्पण करावे. अर्घ्य देताना सूर्य मंत्र आणि गायत्री मंत्राचा जप केल्यास विशेष फलप्राप्ती होते, असे धार्मिक मानले जाते.
अर्घ्यदान करताना सूर्याकडे पाहणे शुभ समजले जाते. त्यानंतर सूर्यदेवाचे स्मरण करत तुपाचा दिवा लावावा आणि तीन वेळा प्रदक्षिणा घालाव्यात. श्रद्धेने आणि नियमपूर्वक केलेल्या या पूजेमुळे जीवनातील अडचणी दूर होतात आणि सकारात्मक ऊर्जा प्राप्त होते, असे मानले जाते. यंदा सर्वार्थ सिद्धी योगाचा लाभ असल्याने मकर संक्रांतीला केलेली पूजा, स्नान आणि दान अधिक फलदायी ठरणार आहे.