मुंबई - दाक्षिणात्य चित्रपटसृष्टीतील लोकप्रिय जोडी रश्मिका मंदाना आणि विजय देवरकोंडा अखेर विवाहबंधनात अडकली आहे. २६ फेब्रुवारी २०२६ रोजी उदयपूरमध्ये पार पडलेल्या शाही सोहळ्यानंतर ‘मिस्टर अँड मिसेस देवरकोंडा’ पहिल्यांदाच कॅमेरासमोर एकत्र दिसले.
लग्नानंतर शुक्रवारी दोघेही उदयपूर विमानतळावर हातात हात घालून आले. चेहऱ्यावरचा आनंद, एकमेकांकडे पाहताना दिसणारी आपुलकी आणि चाहत्यांना दिलेला नम्र प्रतिसाद यामुळे हा क्षण अधिक खास ठरला. पापाराझींसमोर दोघांनी हसत-हसत पोझ दिल्या, हात जोडून आभार मानले आणि फ्लाइंग किस देत चाहत्यांचे अभिवादन केले.
पारंपरिक लूकने वेधले लक्ष-
यावेळी रश्मिकाने लाल रंगाचा आकर्षक सूट परिधान केला होता, तर विजयने साधा पण स्टायलिश को-ऑर्ड सेट निवडला होता. दोघांचाही लूक साधेपणातला देखणा असा होता. विजयने रश्मिकाला पोझ देण्यासाठी हलकासा इशारा केल्याचा क्षणही कॅमेऱ्यात कैद झाला आणि तो व्हिडीओ सोशल मीडियावर व्हायरल झाला आहे.
लग्नाचे फोटो सोशल मीडियावर व्हायरल-
गुरुवारी सकाळपासूनच चाहते लग्नाच्या फोटोंची आतुरतेने वाट पाहत होते. विवाहस्थळी कडक सुरक्षा व्यवस्था आणि मोबाईल-कॅमेरा वापरावर बंदी असल्याने कोणतेही फोटो लीक झाले नव्हते. अखेर संध्याकाळी रश्मिका आणि विजयने स्वतःच लग्नसोहळ्याचे फोटो सोशल मीडियावर शेअर करत एकमेकांवरील प्रेम जाहीर केले.
गेल्या काही वर्षांपासून दोघे रिलेशनशिपमध्ये असल्याच्या चर्चा रंगत होत्या; मात्र त्यांनी कधीही अधिकृत कबुली दिली नव्हती. त्यामुळे थेट लग्नाचे फोटो समोर आल्याने चाहत्यांना सुखद धक्का बसला. चाहत्यांसह अनेक सेलिब्रिटींनी या नवदांपत्यावर शुभेच्छांचा वर्षाव केला.
हटके पण पारंपरिक वेषभूषा-
लग्नसोहळ्यातील दोघांचा लूक पारंपरिकतेचा आधुनिकतेशी मिलाफ करणारा होता. पोशाख, दागिने आणि प्रत्येक तपशील बारकाईने डिझाइन करण्यात आला होता. वर-वधूच्या रुपात दोघेही अत्यंत देखणे दिसत असल्याच्या प्रतिक्रिया सोशल मीडियावर उमटत आहेत.
‘मिस्टर अँड मिसेस देवरकोंडा’ची ही पहिली सार्वजनिक झलक चाहत्यांसाठी खास ठरली असून, पुढील काही दिवसांत त्यांच्या लग्नसोहळ्याशी संबंधित आणखी खास क्षण समोर येण्याची शक्यता आहे.
