नागपूर : नागपूर महानगरपालिकेच्या स्थायी समितीच्या अध्यक्षपदी भाजपच्या नगरसेविका शिवानी दानी यांची सोमवारी बिनविरोध निवड करण्यात आली. विरोधी पक्ष काँग्रेसकडून अर्ज न आल्याने ही निवड एकतर्फी ठरली.
अध्यक्षपदासाठी दानी यांचाच एकमेव नामनिर्देशन अर्ज सादर झाल्याने निवडणूक निर्णय अधिकारी तथा जिल्हाधिकारी विपिन इटनकर यांनी त्यांची निवड झाल्याची घोषणा केली. स्थायी समितीच्या १६ सदस्यीय संरचनेत भाजपचे ११ सदस्य असल्याने पक्षाकडे स्पष्ट बहुमत आहे. काँग्रेसचे चार तर मुस्लिम लीगचा एक सदस्य समितीत आहे. मात्र संख्याबळ कमी असल्याने काँग्रेसने उमेदवार उभा केला नाही.
भाजपने यापूर्वीच दानी यांच्या नावावर अंतिम शिक्कामोर्तब केल्याने निकाल जवळपास निश्चित मानला जात होता. त्यामुळे निवड प्रक्रिया केवळ औपचारिकतेपुरती मर्यादित राहिली.महानगरपालिकेच्या अर्थकारभारावर नियंत्रण ठेवणारी आणि विविध प्रशासकीय प्रस्तावांना मंजुरी देणारी स्थायी समिती ही मनपातील अत्यंत प्रभावी यंत्रणा मानली जाते. परिणामी या निवडीकडे राजकीय वर्तुळासोबतच नागपूरकरांचेही लक्ष लागले होते.
