मुंबई : मराठी मनोरंजनविश्वातील लोकप्रिय अभिनेत्री प्राजक्ता माळी सध्या तिच्या एका वक्तव्यामुळे चर्चेत आली आहे. वयाच्या ३६ व्या वर्षीही अविवाहित असलेल्या प्राजक्ताने अलीकडेच दिलेल्या मुलाखतीत प्रेम आणि नातेसंबंधांविषयी आपले ठाम विचार मांडले. तिच्या या भूमिकेचे सोशल मीडियावर मोठ्या प्रमाणात कौतुक होत आहे.
अभिनय, सूत्रसंचालन, नृत्य आणि उद्योजकता अशा विविध क्षेत्रांत आपली वेगळी ओळख निर्माण करणाऱ्या प्राजक्ताने प्रेमाबद्दल बोलताना ते केवळ क्षणिक भावना नसल्याचे स्पष्ट केले. लगेच वाटणारी भावना ही प्रेम नसून ते आकर्षण असते, असे तिचे मत आहे. दोन व्यक्तींमध्ये आत्मिक किंवा कार्मिक पातळीवर नाते जुळल्यावरच खरे प्रेम निर्माण होते, असे ती म्हणाली.
तिने पुढे सांगितले की, वाचन आणि अनुभवांमुळे प्रेमाची तिची व्याख्या बदलली आहे. काही तत्त्वज्ञानांनुसार मागील जन्मातील नात्यांचा प्रभाव या जन्मातील संबंधांवर पडतो, अशी धारणा असल्याचेही तिने नमूद केले. त्यामुळे प्रेमाकडे पाहण्याचा तिचा दृष्टिकोन अधिक सखोल आणि विचारप्रधान असल्याचे तिने सांगितले.
प्राजक्ताच्या या परखड मतांमुळे अनेक चाहत्यांनी तिच्या विचारांचे समर्थन केले आहे. समाजाच्या अपेक्षा आणि विवाहाबाबतच्या चौकटींपलीकडे जाऊन स्वतःच्या भूमिकेवर ठाम राहणारी प्राजक्ता अनेकांसाठी प्रेरणादायी ठरत आहे.