नागपूर : शहरातील छोटा ताजबाग परिसरात घरगुती गॅस सिलेंडरच्या तुटवड्यामुळे नागरिकांची मोठी गैरसोय होत असल्याचे चित्र समोर आले आहे. गॅस मिळवण्यासाठी नागरिकांना पहाटेपासूनच रांगेत उभे राहावे लागत असून, अनेकांना तासन्तास प्रतीक्षा करूनही सिलेंडर मिळत नसल्याने संताप व्यक्त केला जात आहे.
सध्या आंतरराष्ट्रीय स्तरावर सुरू असलेल्या इराण–इस्रायल संघर्षाच्या पार्श्वभूमीवर इंधन पुरवठ्यावर परिणाम झाल्याची चर्चा नागरिकांमध्ये रंगली आहे. या परिस्थितीचा परिणाम स्थानिक गॅस पुरवठ्यावर झाल्याचा अंदाज व्यक्त केला जात असून, अनेक ठिकाणी सिलेंडरचा तुटवडा जाणवत आहे.
दरम्यान, केवळ घरगुती गॅसच नव्हे तर व्यावसायिक गॅस सिलेंडर मिळण्यातही अडचणी निर्माण झाल्या आहेत. त्यामुळे छोट्या हॉटेल्स, टपऱ्या आणि खानावळी चालवणाऱ्या व्यावसायिकांनाही मोठा फटका बसत आहे. गॅस उपलब्ध नसल्यामुळे काही व्यावसायिकांना आपले व्यवसाय तात्पुरते बंद ठेवण्याची वेळ आली आहे.
या पार्श्वभूमीवर गॅस वितरकांकडून पुरेसा पुरवठा करण्याची मागणी नागरिकांकडून होत असून, प्रशासनाने तातडीने हस्तक्षेप करून परिस्थिती सुरळीत करावी, अशी अपेक्षा व्यक्त केली जात आहे. नागरिकांना मूलभूत सुविधेसाठी रांगा लावाव्या लागत असल्याने प्रशासनाच्या व्यवस्थेवरही प्रश्नचिन्ह उपस्थित होत आहे.