मुंबई : गुढीपाडव्याच्या पार्श्वभूमीवर राज्यात अवकाळी पावसाचे वातावरण निर्माण झाले असून सणाच्या आनंदात काहीसा व्यत्यय येण्याची चिन्हे दिसत आहेत. वातावरणातील बदलांमुळे ढगाळ हवामान तयार झाले आहे आणि अनेक भागांत पावसाचा अंदाज व्यक्त करण्यात आला आहे.
मुंबईत गुढीपाडव्याच्या दिवशी हलक्या सरींची शक्यता हवामान विभागाने वर्तवली आहे. ठाणे आणि पालघर परिसरातही मेघगर्जनेसह पाऊस पडू शकतो, त्यामुळे सणानिमित्त होणाऱ्या कार्यक्रमांवर पावसाचा परिणाम होण्याची शक्यता आहे.अवकाळी स्थितीमुळे राज्यातील तापमानात काहीशी घसरण झाली असली तरी आर्द्रता वाढल्याने उकाड्याची तीव्रता कमी झालेली नाही. त्यामुळे वातावरणात उष्णतेची जाणीव कायम आहे.
कोकण किनारपट्टीवर सुरुवातीला कोरडे वातावरण राहण्याची शक्यता असली तरी त्यानंतर पावसाची हजेरी लागण्याचा अंदाज आहे. रायगड आणि रत्नागिरी जिल्ह्यांना सतर्कतेचा इशारा देण्यात आला असून विजांच्या कडकडाटासह जोरदार वाऱ्यांची शक्यता आहे, तर सिंधुदुर्गात हलक्या पावसाचा अंदाज व्यक्त करण्यात आला आहे.
विदर्भ आणि मराठवाड्यातही पावसाचा प्रभाव जाणवण्याची शक्यता असून अनेक जिल्ह्यांसाठी ‘यलो अलर्ट’ जारी करण्यात आला आहे. काही ठिकाणी आधीच मेघगर्जनेसह पावसाची नोंद झाली आहे. परभणी, बीड, हिंगोली, नांदेड, लातूर आणि धाराशीव या भागांत विशेष सतर्कता बाळगण्याचे आवाहन करण्यात आले आहे.
याशिवाय धुळे, नंदुरबार, जळगाव, नाशिक आणि कोल्हापूर येथेही पावसाची शक्यता असून पुणे, सातारा, सांगली आणि अहिल्यानगर या भागांत पुढील दोन दिवसांत मेघगर्जनेसह पावसाचा अंदाज आहे. सोलापूरमध्येही काही दिवस पावसाचे वातावरण कायम राहण्याची शक्यता आहे.एकूणच, यंदाच्या गुढीपाडव्यावर अवकाळी पावसाचे सावट असल्याने नागरिकांनी सतर्क राहून आवश्यक ती खबरदारी घ्यावी, असे आवाहन हवामान विभागाकडून करण्यात आले आहे.