मुंबई : राज्याच्या मंत्रालयात गुरुवारी लाचलुचपत प्रतिबंधक विभागाने टाकलेल्या सापळ्यात अन्न व औषध प्रशासन मंत्री नरहरी झिरवाळ यांच्या दालनातील एका लिपिकाला ३५ हजार रुपयांची लाच स्वीकारताना पकडण्यात आले. या कारवाईमुळे मंत्रालयात एकच खळबळ उडाली आहे.
माहितीनुसार, परवाना नूतनीकरणाच्या प्रक्रियेसाठी संबंधित कर्मचाऱ्याने सुरुवातीला ५० हजार रुपयांची मागणी केल्याची तक्रार करण्यात आली होती. तक्रारदाराने लाचलुचपत प्रतिबंधक विभागाशी संपर्क साधल्यानंतर अधिकाऱ्यांनी नियोजनबद्ध कारवाई आखली. चर्चेनंतर ३५ हजार रुपयांवर तडजोड ठरली आणि ही रक्कम स्वीकारताच अधिकाऱ्यांनी तिसऱ्या मजल्यावरील कार्यालयात धाड टाकून संबंधित लिपिकाला ताब्यात घेतले.
कारवाईनंतर कार्यालयातील कागदपत्रांची छाननी सुरू करण्यात आली असून पुरावे गोळा करण्याची प्रक्रिया सुरू आहे. अटकेतील कर्मचाऱ्याची कसून चौकशी केली जात असून या प्रकरणात आणखी कोणी सहभागी आहे का, याचाही तपास सुरू असल्याची माहिती समोर येत आहे.
या घटनेवर प्रतिक्रिया देताना मंत्री नरहरी झिरवाळ यांनी संबंधित कर्मचाऱ्याचे कृत्य वैयक्तिक असल्याचे स्पष्ट केले. तपासात आपला कोणताही संबंध आढळल्यास जबाबदारी स्वीकारण्याची तयारी त्यांनी दर्शवली.
दरम्यान, विरोधकांनी या प्रकरणावरून सरकारवर निशाणा साधत मंत्रालयातील भ्रष्टाचाराबाबत कठोर पावले उचलण्याची मागणी केली आहे. पुढील तपासातून आणखी धक्कादायक बाबी समोर येण्याची शक्यता वर्तवली जात आहे.
