नागपूर : व्हॅलेंटाईन डेच्या दिवशी क्लबमध्ये घडलेल्या मारामारीच्या घटनेनंतर नागपूर पोलिसांनी कडक पाऊल उचलत शिवाजीनगर येथील Raasta Club हा क्लब १५ दिवसांसाठी सील केला आहे. विविध नियमांचे उल्लंघन झाल्याचे आढळून आल्याने ११ मार्चपासून ही कारवाई अमलात आणण्यात आली.
ही कारवाई शिवाजी नगर परिसरातील अंबाझरी पोलिस स्टेशन हद्दीत करण्यात आली. पोलीस उपायुक्त नित्यानंद झा यांच्या मार्गदर्शनाखाली पोलिसांनी ही कारवाई केली. व्हॅलेंटाईन डेच्या दिवशी क्लबमध्ये दोन गटांमध्ये झालेल्या भांडणाचा व्हिडिओ सोशल मीडियावर मोठ्या प्रमाणात व्हायरल झाल्यानंतर पोलिसांनी स्वतःहून या प्रकरणाची दखल घेत चौकशी सुरू केली होती.
व्हायरल झालेल्या व्हिडिओमध्ये क्लबच्या डान्स फ्लोअरवर दोन गटांमध्ये जोरदार हाणामारी सुरू असल्याचे दिसून येत होते. मात्र त्या वेळी संगीत सुरूच असल्याने आणि परिस्थिती नियंत्रणात आणण्यास विलंब झाल्याने क्लब व्यवस्थापनाच्या सुरक्षा व्यवस्थेबाबत प्रश्नचिन्ह निर्माण झाले. विशेष म्हणजे, ही घटना घडल्यानंतरही क्लब प्रशासनाने तातडीने पोलिसांना माहिती दिली नव्हती.
यानंतर पोलिसांनी क्लबची तपासणी केली असता काही गंभीर बाबी समोर आल्या. तपासादरम्यान अल्पवयीन मुलांकडून मद्यपान केल्याचे प्रकार आढळून आले. तसेच पार्किंग व्यवस्थेतील नियमभंग आणि इतर परवानगीसंबंधी अटींचे उल्लंघन झाल्याचेही स्पष्ट झाले.
या सर्व अनियमितता लक्षात घेऊन पोलिसांनी संबंधित क्लब १५ दिवसांसाठी बंद ठेवण्याचे आदेश दिले आहेत. या घटनेनंतर शहरातील रात्री उशिरापर्यंत सुरू राहणाऱ्या मनोरंजन केंद्रांच्या सुरक्षेच्या उपाययोजनांवर पुन्हा एकदा चर्चा सुरू झाली आहे. यापूर्वीही नियमभंगाच्या प्रकरणांमुळे शहरातील काही क्लबवर कारवाई झाली होती. त्यामुळे अशा ठिकाणांवर आता पोलिसांचे अधिक बारकाईने लक्ष राहणार असल्याचे संकेत मिळत आहेत.