कल्याण : डोंबिवली परिसरात एक अत्यंत धक्कादायक प्रकार उघडकीस आला असून रेल्वेत नोकरी मिळवून देण्याचे आमिष दाखवत एका महिलेला जाळ्यात ओढून तिच्यावर लैंगिक अत्याचार केल्याची घटना समोर आली आहे. या प्रकरणात आरोपीने वेगवेगळी नावे वापरून विश्वास संपादन केल्याचे उघड झाले आहे.
मिळालेल्या माहितीनुसार, संबंधित आरोपीने महिलेला नोकरीच्या बहाण्याने घरी बोलावून तिला गुंगीचे औषध दिले आणि तिच्यावर अत्याचार केला. यावेळी त्याने तिचे अश्लील फोटो व व्हिडिओ तयार करून ते व्हायरल करण्याची धमकी दिली. या धमकीच्या आधारे तो अनेक वर्षे तिचे लैंगिक शोषण करत राहिला.
इतक्यावर न थांबता, आरोपीने पीडित महिलेच्या पतीलाही रेल्वे कंत्राट मिळवून देण्याचे आश्वासन देत तब्बल १० लाख रुपये उकळल्याचे समोर आले आहे. काही काळानंतर पतीला फसवणुकीचा संशय आल्याने त्याने पत्नीशी चर्चा केली असता संपूर्ण प्रकार उघड झाला. यामुळे पतीला मोठा मानसिक धक्का बसला.
यानंतर दोघांनीही तात्काळ पोलिस ठाण्यात धाव घेत तक्रार दाखल केली. तक्रारीच्या आधारे रामनगर पोलिसांनी संबंधित आरोपीविरोधात गुन्हा नोंदवला आहे. मात्र, गुन्हा दाखल होऊनही आरोपी अद्याप फरार असल्याचे समजते.
दरम्यान, आरोपी हा व्याजाने पैसे देण्याचा व्यवसाय करत असून वसुलीसाठी महिलांकडून अश्लील मागण्या केल्याचे आरोपही समोर येत आहेत. या प्रकरणी आणखी काही महिलांनीही पुढे येत तक्रार करण्याची तयारी दर्शवली आहे.
विशेष म्हणजे, अटक टाळण्यासाठी आरोपीने कल्याण सत्र न्यायालयात अटकपूर्व जामिनासाठी अर्ज केला होता. मात्र, न्यायालयाने हा अर्ज फेटाळून लावल्याची माहिती फिर्यादीच्या वकिलांनी दिली आहे. पोलिसांकडून आरोपीचा शोध सुरू असून लवकरच अटक होण्याची शक्यता व्यक्त केली जात आहे.