भंडारा : मोबाईलवर गॅस सिलेंडर वितरित झाल्याचे संदेश मिळत असतानाही प्रत्यक्षात सिलेंडर हातात न पडल्याने भंडाऱ्यात नागरिकांचा रोष उसळला. या संतापातून नागरिकांनी भंडारा-नागपूर महामार्गावर ठिय्या देत वाहतूक रोखली.
खात रोड परिसरातील एचपी गॅस एजन्सीच्या गोडाऊनबाहेर पहाटेपासूनच मोठी गर्दी उसळली होती. प्रखर उन्हात दीर्घकाळ प्रतीक्षा करूनही सिलेंडर मिळत नसल्याने नागरिक त्रस्त झाले. काही ग्राहकांना ‘डिलिव्हर’ झाल्याचे संदेश आले, तर काहींच्या खात्यात अनुदानाची रक्कमही जमा झाली होती. मात्र, प्रत्यक्ष वितरण न झाल्याने नागरिकांनी संताप व्यक्त केला.
एजन्सीकडून समाधानकारक उत्तर न मिळाल्याने नागरिकांनी आक्रमक पवित्रा घेत भंडारा-रामटेक मार्गावरील महामार्ग अडवून धरला. अचानक उभ्या राहिलेल्या या आंदोलनामुळे वाहतूक विस्कळीत झाली.
घटनेनंतर परिसरात तणावाचे वातावरण निर्माण झाले असून, परिस्थिती नियंत्रणात आणण्यासाठी प्रशासनाची धावपळ सुरू आहे. या प्रकाराची सखोल चौकशी करून दोषींवर कारवाई करण्याची मागणी नागरिकांकडून केली जात आहे.
