सांगली : राष्ट्रवादी काँग्रेसमध्ये अंतर्गत मतभेद पुन्हा एकदा उफाळून आले असून, स्वीकृत नगरसेवक निवडीवरून मोठा वाद निर्माण झाला आहे. या पार्श्वभूमीवर सांगलीतील तब्बल ३५ पदाधिकाऱ्यांनी तडकाफडकी आपल्या पदांचा राजीनामा दिला आहे. या घडामोडींमुळे पक्षातील नाराजी चव्हाट्यावर आली आहे.
स्वीकृत नगरसेवक पदाच्या निवडीवरून स्थानिक पातळीवर असंतोष वाढत होता. अखेर या नाराजीचा उद्रेक होत पदाधिकाऱ्यांनी शहर जिल्हाध्यक्ष पद्माकर जगदाळे यांच्याकडे आपले राजीनामे सादर केले. पक्षाच्या आदेशाला डावलत महापालिकेतील गटनेते मैनुद्दीन बागवान यांनी पक्षाशी संबंध नसलेल्या व्यक्तीची स्वीकृत नगरसेवकपदी निवड केल्याचा आरोप करण्यात आला आहे. या प्रकरणात बागवान यांच्यावर कठोर कारवाई करावी, अशी मागणीही करण्यात आली आहे.
दरम्यान, या संपूर्ण प्रकरणाची तक्रार उपमुख्यमंत्री सुनेत्रा पवार यांच्याकडे करण्याचा निर्णय स्थानिक पदाधिकाऱ्यांनी घेतला आहे. स्वीकृत नगरसेवक निवडीच्या मुद्द्यावरून राष्ट्रवादी काँग्रेसमधील गटबाजी उघडपणे समोर आली आहे.
अकोल्यात शिंदे गटाला धक्का-
अकोल्यातही राजकीय घडामोडींना वेग आला असून, शिंदे गटाला मोठा धक्का बसला आहे. जिल्हाप्रमुख अश्विन नवले यांनी आपल्या पदाचा राजीनामा देत पक्षाला रामराम ठोकला आहे. त्यांनी माजी आमदार गोपीकिशन बाजोरिया यांच्यासह पक्षातून बाहेर पडण्याचा निर्णय घेतल्याची माहिती समोर आली आहे.
राजीनामा पत्रात नवले यांनी पक्षातील काही नेत्यांच्या कार्यपद्धतीवर नाराजी व्यक्त केली आहे. “पक्षवाढीसाठी प्रामाणिकपणे काम केले, मात्र स्वार्थी वृत्तीच्या व्यक्तीसोबत काम करणे शक्य नाही. समाजसेवक म्हणून काम करत राहू, पण पदासाठी तडजोड करणार नाही,” असे स्पष्ट शब्दांत त्यांनी नमूद केले आहे.
या दोन घडामोडींमुळे राज्यातील राजकीय वातावरण पुन्हा एकदा तापले असून, येणाऱ्या स्थानिक स्वराज्य संस्थांच्या राजकारणावर त्याचा परिणाम होण्याची शक्यता व्यक्त केली जात आहे.