नागपूर : गोरेवाडा प्राणीसंग्रहालय परिसरात वाढत्या बिबट्या दिसण्याच्या घटनांमुळे नागरिकांमध्ये निर्माण झालेल्या भीतीच्या पार्श्वभूमीवर राज्य सरकारने महत्त्वाचा निर्णय घेतला आहे. वनमंत्री गणेश नाईक यांनी विधानसभेत गोरेवाडा प्राणीसंग्रहालयाच्या संरक्षण भिंतीची उंची आवश्यकतेनुसार वाढविण्यात येणार असल्याची घोषणा केली.
पश्चिम नागपूरचे आमदार विकास ठाकरे यांनी या प्रश्नावर सातत्याने आवाज उठवत विधानसभेत हा मुद्दा प्रभावीपणे मांडला होता. विशेषतः दाभा आणि आसपासच्या भागात वारंवार बिबट्यांचे दर्शन होत असल्याने स्थानिक नागरिकांमध्ये असुरक्षिततेची भावना वाढली आहे.
या पार्श्वभूमीवर वन विभागाला तातडीने उपाययोजना राबविण्याचे निर्देश देण्यात आले आहेत. परिसरातील मोकळ्या जागांमधील झुडपे व दाट गवत हटविणे, अंधार असलेल्या भागांत हायमास्ट दिवे व रस्त्यावरील प्रकाशयोजना मजबूत करणे, तसेच वन कर्मचाऱ्यांच्या गस्तीमध्ये वाढ करणे अशा उपाययोजना करण्यात येणार आहेत.
दरम्यान, पूर्व नागपूरातील पारडी परिसरात घडलेल्या बिबट्याच्या घटनेचाही मुद्दा विधानसभेत उपस्थित झाला. यासोबतच विमानतळ परिसरातही बिबट्यांच्या हालचाली दिसून आल्याच्या घटनांकडे लक्ष वेधण्यात आले.
नागरिकांच्या सुरक्षिततेला सर्वोच्च प्राधान्य देत प्रशासन कोणतीही तडजोड करणार नसल्याचे स्पष्ट करण्यात आले असून, बिबट्यांच्या घुसखोरीवर प्रभावी नियंत्रण मिळवण्यासाठी सर्व आवश्यक पावले उचलली जाणार असल्याचा ठाम संदेश देण्यात आला आहे.
