नागपूर : काटोल तालुक्यातील राऊळगाव येथील एसबीएल एनर्जी लिमिटेड या स्फोटक तयार करणाऱ्या कारखान्यात १ मार्च रोजी घडलेल्या भीषण स्फोट दुर्घटनेतील मृतांची संख्या वाढतच असून ती आता २२ वर पोहोचली आहे. गंभीर जखमी असलेल्या आणखी दोन महिला कामगारांचा उपचार सुरू असताना मृत्यू झाल्याने या दुर्घटनेचे गांभीर्य पुन्हा एकदा अधोरेखित झाले आहे.
मिळालेल्या माहितीनुसार, आम्रपाली अनिल कालसर्पे (वय ३८) यांचा ७ मार्च रोजी रात्री नागपूरमधील रुग्णालयात उपचारादरम्यान मृत्यू झाला. तर रोशनी सूर्यकांत उमाठे (वय २८) यांचे रविवारी दुपारच्या सुमारास ऑरेंज सिटी रुग्णालयात उपचार सुरू असताना निधन झाले. या दोन मृत्यूंमुळे या भीषण स्फोटातील मृतांचा आकडा २२ वर गेला आहे.
१ मार्च रोजी सकाळी सुमारे ७ ते ८.३० या वेळेत कारखान्यातील १६-बी आणि २०-बी या नॉन-क्रिमिंग विभागात एकामागून एक जोरदार स्फोट झाले होते. स्फोटांचा आवाज अनेक किलोमीटरपर्यंत ऐकू आल्याने आसपासच्या परिसरात मोठी दहशत निर्माण झाली होती.
या दुर्घटनेत आतापर्यंत २० महिला आणि दोन पुरुष कामगारांनी प्राण गमावले असून २० पेक्षा अधिक कामगार जखमी झाले आहेत. जखमींवर नागपूरमधील विविध रुग्णालयांमध्ये उपचार सुरू आहेत.
दरम्यान, मृतांच्या कुटुंबीयांनी प्रशासनाकडे आर्थिक मदत आणि योग्य नुकसानभरपाईची मागणी केली आहे. या घटनेनंतर स्फोटक उद्योगांमधील सुरक्षेच्या नियमांबाबत गंभीर प्रश्न उपस्थित झाले असून सामाजिक संस्था व स्थानिक नागरिकांनी अशा कारखान्यांमध्ये कडक सुरक्षा उपाययोजना राबवण्याची मागणी केली आहे.