मुंबई: महसूल मंत्री चंद्रशेखर बावनकुळे यांनी झी २४ तासच्या कथित ‘ऑपरेशन खैरात’ स्टिंगवर तीव्र संताप व्यक्त केला आहे. बुधवारी सायंकाळी सात वाजता प्रसारित झालेल्या या स्टिंगमध्ये त्यांच्या आणि महसूल विभागाच्या नावाचा विनाकारण वापर झाल्याचा आरोप त्यांनी केला.
बावनकुळे म्हणाले की, या स्टिंगच्या मागे काही स्वार्थी घटक असून जनमानसात महसूल विभागाची प्रतिमा मलीन करण्यासाठी ही कारवाई जाणूनबुजून रचली गेली आहे. त्यांनी स्पष्ट केले की, हा एक दयनीय प्रयत्न आहे, ज्यामध्ये अधिकाऱ्यांना बदनाम करण्यासाठी त्यांचे नाव जोडले गेले.
या पार्श्वभूमीवर मंत्री बावनकुळे यांनी झी २४ तासविरोधात १०० कोटी रुपयांचा मानहानीचा दावा दाखल करण्याचे आदेश दिले आहेत. तसेच, दिवाणी व फौजदारी कारवाईही सुरू करण्याचे निर्देश दिले आहेत. त्यांनी म्हटले की, बनावट आणि दिशाभूल करणारी माहिती प्रसारित करणाऱ्यांविरुद्ध कठोर पावले उचलली जातील.
सरकारी नोंदींनुसार, मंत्र्यांनी या प्रकरणात कोणताही निर्णय घेतलेला नाही किंवा अर्ध-न्यायिक अधिकार वापरलेले नाहीत. नोंदणी व मुद्रांक महानिरीक्षक (IGR) यांनी कायद्याच्या चौकटीत राहून सविस्तर विचारविनिमयानंतर योग्य निर्णय घेतल्याचा दावा त्यांनी केला.
बावनकुळे म्हणाले की, या कथित स्टिंगद्वारे अधिकाऱ्यांवर दबाव आणण्याचा निंदनीय प्रयत्न केला गेला आहे. ‘ऑपरेशन खैरात’ हा कार्यक्रम कायदेशीर प्रक्रियेबाबत अज्ञान आणि दिशाभूल दर्शवतो, असे ते म्हणाले. मंत्री बावनकुळे यांनी सर्व स्तरातून या दबाव तंत्राचा निषेध होण्याची गरज व्यक्त केली.