नवी दिल्ली : रेल्वेत सरकारी नोकरीचे स्वप्न पाहणाऱ्या तरुणांसाठी मोठी आनंदाची बातमी समोर आली आहे. २०२६ वर्षात रेल्वे विभागात तब्बल ६५६५ टेक्निशियन पदांची भरती होणार असून, यासाठी रेल्वे मंत्रालयाने अधिकृत मंजुरी दिली आहे.
रेल्वे बोर्डाने सर्व विभागीय रेल्वे आणि युनिट्सना त्यांच्या रिक्त पदांची माहिती OIRMS प्रणालीत एका आठवड्यात सादर करण्याचे निर्देश दिले आहेत. त्यानंतर केंद्रीय स्तरावर भरती अधिसूचना प्रसिद्ध केली जाणार असून, प्रत्यक्ष भरती प्रक्रियेला वेग मिळणार आहे. या प्रक्रियेत आरआरबी बंगळुरू महत्त्वाची भूमिका पार पाडणार आहे.
विभागनिहाय पदसंख्या या भरतीमध्ये विविध रेल्वे विभागांमध्ये पदे भरण्यात येणार आहेत. त्यात मध्य रेल्वेत सर्वाधिक भरती होणार असून सुमारे ८७० पदे भरली जातील. याशिवाय पश्चिम रेल्वे (५४४), पश्चिम मध्य रेल्वे (२३१), पूर्व मध्य रेल्वे (१८६) आणि ईस्ट कोस्ट रेल्वे (१६९) अशा विविध विभागांमध्येही भरती होणार आहे.
शैक्षणिक पात्रता आणि वयोमर्यादा या भरतीत टेक्निशियन पदांसाठी उमेदवारांकडे बी.ई./बी.टेक, अभियांत्रिकी पदवी किंवा बी.एस्सी असणे आवश्यक आहे. टेक्निशियन ग्रेड-II साठी संबंधित ट्रेडमध्ये आयटीआय उत्तीर्ण असणे आवश्यक आहे. तसेच १२वी (PCM) उत्तीर्ण उमेदवारही पात्र असतील.
वयोमर्यादेनुसार,
टेक्निशियन ग्रेड-I (सिग्नल) : १८ ते ३३ वर्षे
टेक्निशियन ग्रेड-III : १८ ते ३० वर्षे
दरम्यान, या भरतीची अधिकृत जाहिरात लवकरच प्रसिद्ध होणार असून, इच्छुक उमेदवारांनी तयारी सुरू ठेवावी, असे आवाहन करण्यात आले आहे.
