पुणे:पुणे महानगरपालिकेच्या महापौरपदी भाजपच्या नगरसेविका मंजूषा नागपुरे यांची निवड निश्चित झाली असून शहराच्या राजकारणात महिलांच्या नेतृत्वाची नवी सुरुवात झाली आहे. महापौरपदाची निवडणूक बिनविरोध होत असल्याने आता केवळ औपचारिक घोषणा बाकी आहे.
भाजप आणि राष्ट्रवादी काँग्रेस यांच्यातील वरिष्ठ पातळीवरील चर्चेनंतर राष्ट्रवादीने महापौर व उपमहापौर पदासाठी उमेदवार न देण्याचा निर्णय घेतला. देवेंद्र फडणवीस आणि अजित पवार यांच्यात झालेल्या चर्चेचा हा परिणाम मानला जात असून त्यामुळे भाजपचा मार्ग सुकर झाला आहे.
सिंहगड रोड परिसराला पहिल्यांदाच महापौरपद-
मंजूषा नागपुरे या सिंहगड रोड परिसरातून सलग तिसऱ्यांदा नगरसेवक म्हणून निवडून आल्या आहेत. यंदाच्या निवडणुकीत त्या प्रभाग क्रमांक 35, सनसिटी–माणिकबाग येथून बिनविरोध विजयी झाल्या होत्या. त्यांच्या निवडीमुळे या भागाला प्रथमच महापौरपदाचा मान मिळाला आहे.
महापौर आणि उपमहापौर पदाची निवडणूक बिनविरोध होणार असल्याचा निर्णय आधीच ठरल्याने प्रत्यक्ष मतदानाची प्रक्रिया पार पडलेली नाही. संपूर्ण निवडणूक प्रक्रिया शांत आणि सौहार्दपूर्ण वातावरणात पार पडली.
उपमहापौरपदी परशुराम वाडेकर-
महापौरपदासोबतच उपमहापौरपदासाठी रिपब्लिकन पार्टी ऑफ इंडियाचे परशुराम वाडेकर यांच्या नावाची घोषणा करण्यात आली आहे. भाजप शहराध्यक्ष धीरज घाटे यांनी पक्षाच्या बैठकीत या दोन्ही नावांची अधिकृत माहिती दिली.
दरम्यान, अजित पवार यांच्या निधनाच्या पार्श्वभूमीवर कोणतेही जल्लोष, फटाके, बॅनर किंवा गुलाल टाळण्याच्या सूचना भाजपकडून नगरसेवकांना देण्यात आल्या आहेत. सभागृह नेते गणेश बिडकर यांनी या संदर्भात मार्गदर्शन केले आहे.
भाजपची एकहाती सत्ता, महिलांचे प्रतिनिधित्व वाढले-
पुणे महापालिकेत भाजपचे एकूण 119 नगरसेवक निवडून आले असून पालिकेवर पक्षाची भक्कम सत्ता प्रस्थापित झाली आहे. यंदा महापौरपद सर्वसाधारण गटातील महिलेसाठी राखीव होते. भाजपने मोठ्या संख्येने महिलांना उमेदवारी दिली असून 50 हून अधिक महिला नगरसेविका निवडून आल्या आहेत.
या निवडीमुळे पुणे महानगरपालिकेत महिलांचे नेतृत्व अधिक मजबूत झाले असून शहराच्या कारभारात नवे पर्व सुरू झाल्याचे चित्र आहे.