नागपूर : शहरातील गड्डीगोदाम परिसरात अमानुष अवस्थेत ठेवलेल्या ११ जनावरांची सदर पोलिसांनी धाड टाकून सुटका केली. शनिवारी (१८ एप्रिल) पहाटे ही कारवाई पार पडली असून, या प्रकरणी अज्ञात व्यक्तींविरुद्ध गुन्हा दाखल करण्यात आला आहे.
मिळालेल्या माहितीनुसार, पहाटे सुमारे १.४० वाजता गस्त घालत असलेल्या पोलिस पथकाला लाल शाळा परिसरात काही जनावरे बांधून ठेवण्यात आल्याची गुप्त माहिती मिळाली. माहितीच्या आधारे पोलिसांनी तातडीने घटनास्थळी पोहोचून पाहणी केली असता, ११ जनावरे अत्यंत कोंदट आणि हालअपेष्टांमध्ये ठेवलेली आढळून आली. त्यांना अन्न-पाण्याचीही सोय नसल्याचे स्पष्ट झाले.
ही जनावरे कत्तलीच्या उद्देशाने ठेवण्यात आल्याचा संशय पोलिसांनी व्यक्त केला आहे. घटनास्थळावरून अंदाजे १ लाख ९५ हजार रुपयांच्या किमतीची जनावरे ताब्यात घेण्यात आली. त्यानंतर त्यांना धंतोली येथील गोरक्षण केंद्रात हलवून सुरक्षित ठेवण्यात आले आहे.
या प्रकरणी पोलिस शिपाई मोहनसिंग ठाकूर यांच्या तक्रारीवरून अज्ञात आरोपींविरुद्ध संबंधित कायद्यांनुसार गुन्हा नोंदवण्यात आला आहे. सध्या पोलिसांकडून आरोपींचा शोध घेण्याचे काम सुरू असून, अधिक तपास सुरू आहे.