भुवनेश्वर : ओडिशातील तीन जिल्हा न्यायालयांना ई-मेलद्वारे बॉम्बस्फोटाच्या धमक्या मिळाल्याने शुक्रवारी राज्यात एकच खळबळ उडाली. कटक, पुरी आणि फुलबनी येथील जिल्हा व सत्र न्यायालयांना ही धमकी देण्यात आल्याचे समोर आले असून, खबरदारीचा उपाय म्हणून पोलिसांनी तातडीने न्यायालयीन परिसर रिकामा केला.
मिळालेल्या माहितीनुसार, अज्ञात व्यक्तीकडून पाठवण्यात आलेल्या ई-मेलमध्ये न्यायालयांच्या आवारात बॉम्ब स्फोट घडवून आणण्याची धमकी देण्यात आली होती. या मेलमुळे न्यायाधीश, वकील, कर्मचारी तसेच न्यायालयात उपस्थित नागरिकांमध्ये भीतीचे वातावरण निर्माण झाले.
धमकीची माहिती मिळताच पोलिस आणि सुरक्षा यंत्रणा अलर्ट मोडवर गेल्या. तिन्ही ठिकाणी बॉम्ब निकामी पथक (BDS) आणि श्वान पथके तैनात करण्यात आली. संपूर्ण परिसराची नाकाबंदी करत कसून तपास करण्यात आला.
ओडिशाचे महाधिवक्ता पितांबर आचार्य यांनी सांगितले की, धमकीचे ई-मेल प्राप्त होताच तिन्ही न्यायालयांमध्ये सखोल शोध मोहीम राबवण्यात आली. सर्व अधिकारी व कर्मचाऱ्यांना संयम राखण्याचे आणि अफवांवर विश्वास न ठेवण्याचे आवाहन करण्यात आले आहे.
पुरीचे पोलीस अधीक्षक प्रतीक सिंह यांनी सांगितले की, कोणताही संशयास्पद प्रकार आढळून आलेला नसला तरी खबरदारी म्हणून तपास सुरू ठेवण्यात आला आहे. कटक आणि फुलबनी येथील न्यायालय परिसरातही पोलिसांनी तत्काळ कारवाई करत संपूर्ण भाग सुरक्षित केला.
दरम्यान, या धमकीमागे कोणाचा हात आहे, याचा शोध घेण्यासाठी सायबर सेलमार्फत ई-मेलचा स्रोत तपासला जात असून, प्रकरणाचा पुढील तपास सुरू आहे.