नागपूर: नागपूर महानगरपालिकेच्या प्रशासनात नवे पर्व सुरू झाले असून नूतन महापौर नीता ठाकरे, उपमहापौर लीलाताई हाथीबेड आणि सत्ताधारी पक्षनेते नरेंद्र (बाल्या) बोरकर यांनी सोमवारी अधिकृतपणे आपल्या पदांची सूत्रे हाती घेतली. महापालिकेच्या मुख्य प्रशासकीय इमारतीत हा पदभार स्वीकार सोहळा पार पडला.
या कार्यक्रमास महाराष्ट्राचे महसूल मंत्री व नागपूर जिल्ह्याचे पालकमंत्री चंद्रशेखर बावनकुळे उपस्थित होते. यावेळी आमदार कृष्णा खोपडे, मोहन मते, भाजप नागपूर शहराध्यक्ष व माजी महापौर दयाशंकर तिवारी, माजी खासदार अजय संचेती, राज्य सफाई कर्मचारी कल्याण मंडळाचे अध्यक्ष सतीश डागोर, माजी आमदार अनिल सोले, विकास कुंभारे, डॉ. मिलिंद माने यांच्यासह राजकीय, प्रशासकीय क्षेत्रातील अनेक मान्यवरांनी हजेरी लावली.
अतिरिक्त आयुक्त वंदना पंत व वैष्णवी बी., भाजपचे ज्येष्ठ नेते संजय भेंडे, बंटी कुकडे, जयप्रकाश गुप्ता, राजेश बागडी, विकी कुकरेजा, माजी महापौर अर्चना देणकर, मायाताई इव्हानाते, माजी स्थायी समिती अध्यक्ष पिंटू झलके, नव-निवडून आलेले नगरसेवक, पदाधिकारी व पक्ष कार्यकर्ते मोठ्या संख्येने उपस्थित होते.
यावेळी उपस्थितांना मार्गदर्शन करताना पालकमंत्री चंद्रशेखर बावनकुळे यांनी जनतेच्या विश्वासाला पात्र ठरण्याचे आवाहन नवनिर्वाचित लोकप्रतिनिधींना केले. मुख्यमंत्री देवेंद्र फडणवीस व केंद्रीय मंत्री नितीन गडकरी यांच्या नेतृत्वाखाली नागपूरचा विकास वेगाने सुरू असून, २०४७ पर्यंत विकसित नागपूर घडविण्यासाठी सर्वांनी योगदान द्यावे, असे त्यांनी सांगितले.
महापौर नीता ठाकरे यांनी पदभार स्वीकारताना महापौरपद ही मोठी जबाबदारी असल्याचे सांगत नागरिकांच्या अपेक्षांवर खरे उतरण्याचा निर्धार व्यक्त केला. शासनाच्या मार्गदर्शनाखाली शहराच्या विकास प्रक्रियेला नवी गती दिली जाईल, असेही त्यांनी स्पष्ट केले.
सत्ताधारी पक्षनेते नरेंद्र (बाल्या) बोरकर यांनी महापालिका प्रशासन आणि लोकप्रतिनिधी यांच्यात समन्वय साधून नागपूरच्या सर्वांगीण प्रगतीसाठी काम केले जाईल, अशी भूमिका मांडली.
यापूर्वी अतिरिक्त आयुक्त वसुमना पंत यांनी महापौर नीता ठाकरे यांचे तर अतिरिक्त आयुक्त वैष्णवी बी. यांनी उपमहापौर लीलाताई हाथीबेड यांचे पुष्पगुच्छ देऊन स्वागत केले. उपआयुक्त निर्भय जैन यांनी सत्ताधारी पक्षनेते नरेंद्र बोरकर यांचे स्वागत केले. आमदार कृष्णा खोपडे, मोहन मते व माजी खासदार अजय संचेती यांनीही यावेळी आपले विचार मांडले.
कार्यक्रमाचे सूत्रसंचालन जनसंपर्क अधिकारी मनीष सोनी यांनी केले. आभारप्रदर्शन नगरसेवक श्रीकांत आगलावे यांनी केले. कार्यक्रमानंतर नूतन महापौर, उपमहापौर व सत्ताधारी पक्षनेत्यांनी आपल्या-आपल्या दालनात जाऊन औपचारिकपणे पदभार स्वीकारला.यानंतर महापालिका मुख्यालय परिसरात ढोल-ताशांचा गजर, फटाक्यांची आतषबाजी आणि पुष्पवृष्टीतून नवनिर्वाचित पदाधिकाऱ्यांचे जल्लोषात स्वागत करण्यात आले.