पोलिसांकडून सखोल तपास, मंत्री भोयर यांचा कडक इशारा
नागपूर : शहरातील बारावीच्या बोर्ड परीक्षेदरम्यान फिजिक्स आणि केमिस्ट्री या विषयांचे पेपर परीक्षा सुरू होण्यापूर्वीच सोशल मीडियावर प्रसारित झाल्याची गंभीर बाब उघड झाली आहे. व्हॉट्सअॅपवर प्रश्नपत्रिका फिरत असल्याचे समोर आल्यानंतर शिक्षण विभागात एकच खळबळ उडाली आहे. या प्रकरणी सदर पोलीस स्टेशन येथे गुन्हा नोंदवण्यात आला असून तपासाला वेग देण्यात आला आहे.
राज्याचे शालेय शिक्षण राज्यमंत्री पंकज भोयर यांनी या घटनेची तातडीने दखल घेत सविस्तर अहवाल सादर करण्याचे आदेश दिले आहेत. पेपर फुटीमागील कोणालाही पाठीशी घातले जाणार नाही, असा स्पष्ट संदेश त्यांनी दिला आहे.प्राथमिक माहितीनुसार, काही विद्यार्थ्यांनी तयार केलेल्या व्हॉट्सअॅप गटावर परीक्षा सुरू होण्यापूर्वीच संबंधित विषयांचे प्रश्नपत्र शेअर करण्यात आले. या प्रकरणात दोन विद्यार्थ्यांची भूमिका संशयाच्या भोवऱ्यात असून, खासगी कोचिंगशी संबंधित व्यक्तीमार्फत पेपर मिळाल्याची शक्यता तपासली जात आहे.
पोलिसांनी संबंधितांचे मोबाईल जप्त करून डिजिटल फॉरेन्सिक तपास सुरू केला आहे. प्रश्नपत्रिका नेमक्या कुठून बाहेर आल्या, त्या किती जणांपर्यंत पोहोचल्या आणि यात आणखी कोणाचा सहभाग आहे का, याचा बारकाईने शोध घेतला जात आहे. परीक्षा केंद्राशी किंवा विभागीय यंत्रणेशी संबंधित कुणी गुंतले आहे का, याचीही चौकशी सुरू आहे.
दरम्यान, परीक्षेदरम्यान संशयास्पद हालचाली लक्षात आल्याने पर्यवेक्षकांनी चौकशी केली आणि त्यातूनच हा प्रकार उघड झाल्याची माहिती समोर आली आहे. घटनेनंतर शिक्षण विभागाने तात्काळ पोलिसांत तक्रार दाखल केली.या संपूर्ण प्रकारामुळे बोर्ड परीक्षांच्या सुरक्षिततेवर प्रश्नचिन्ह निर्माण झाले असून, प्रशासनाकडून पुढील काळात अधिक कडक उपाययोजना केल्या जाण्याची शक्यता व्यक्त केली जात आहे.
