नागपूर : ‘अॅडव्हान्टेज विदर्भ – खासदार औद्योगिक महोत्सव’दरम्यान राज्य सरकार आणि महिंद्रा अँड महिंद्रा लिमिटेड यांच्यात महत्त्वपूर्ण सामंजस्य करार झाला. या करारानुसार नागपूरमध्ये सुमारे १५ हजार कोटी रुपयांची गुंतवणूक करण्यात येणार असून, यामुळे विदर्भाच्या औद्योगिक नकाशावर ऐतिहासिक बदल घडण्याची शक्यता आहे.
या प्रकल्पाची अंमलबजावणी पुढील दहा वर्षांत टप्प्याटप्प्याने होणार असून, २०२८ पासून उत्पादन सुरू होण्याचा अंदाज व्यक्त करण्यात आला आहे. नागपूरमध्ये उभारल्या जाणाऱ्या एकात्मिक ऑटोमोबाईल संकुलात पारंपरिक वाहने, इलेक्ट्रिक वाहने तसेच ट्रॅक्टर निर्मितीचे स्वतंत्र विभाग असतील.
या प्रकल्पासाठी नागपूर परिसरात सुमारे १,५०० एकर जमीन देण्यात येणार आहे. यासोबतच संभाजीनगर येथे १५० एकरांवर सप्लायर पार्क उभारण्यात येणार असून, पुढील टप्प्यात इगतपुरी भागात ३०० एकरांवर त्याचा विस्तार केला जाणार आहे. या गुंतवणुकीमुळे हजारो थेट व अप्रत्यक्ष रोजगाराच्या संधी निर्माण होतील, असा विश्वास व्यक्त करण्यात आला आहे.
महाराष्ट्रातील उद्योगस्नेही धोरणे आणि प्रशासनाची सकारात्मक भूमिका यामुळेच हा प्रकल्प राज्यात येत असल्याचे महिंद्रा अँड महिंद्राचे वरिष्ठ अधिकारी राजेश जेजुरीकर यांनी सांगितले. या करारासाठी मोलाची भूमिका बजावणाऱ्या असोसिएशन फॉर इंडस्ट्रियल डेव्हलपमेंटचे अध्यक्ष आशिष काळे यांच्या प्रयत्नांचे त्यांनी विशेष कौतुक केले.
यावेळी मुख्यमंत्री देवेंद्र फडणवीस यांचे मुख्य वित्तीय सल्लागार कौस्तुभ धावसे, उद्योग सचिव पी. अन्बलगन तसेच केंद्रीय मंत्री नितीन गडकरी यांच्या सहकार्याबद्दलही कृतज्ञता व्यक्त करण्यात आली. मुख्यमंत्री देवेंद्र फडणवीस यांनी आपल्या भाषणात विदर्भात होत असलेल्या मोठ्या गुंतवणुकीचे स्वागत करत, आशिष काळे यांच्या सातत्यपूर्ण पाठपुराव्याचे विशेष उल्लेख केला.