सोलापूर: महाराष्ट्रात मानवी संवेदनांना हादरा देणारी एक गंभीर घटना समोर आली आहे. पैशाच्या हव्यासापोटी एका महिलेच्या आयुष्याशी थेट खेळ केल्याचा धक्कादायक प्रकार उघडकीस आला असून, आरोग्य व्यवस्थेतील मोठ्या त्रुटी पुन्हा एकदा अधोरेखित झाल्या आहेत.
एचआयव्हीसारख्या गंभीर आजाराबाबत जनजागृतीसाठी शासनाने अनेक वर्षांपासून व्यापक मोहीमा राबवल्या आहेत. सार्वजनिक ठिकाणी जनजागृती करून नागरिकांना सुरक्षिततेबाबत मार्गदर्शन करण्यात आले. या प्रयत्नांमुळे या आजाराचा प्रसार काही प्रमाणात आटोक्यात आला होता. मात्र, सोलापूरातील या घटनेमुळे संपूर्ण व्यवस्थेवर प्रश्नचिन्ह निर्माण झाले आहे.
सोलापुरातील आयसीटीसी केंद्रावर गंभीर आरोप
सोलापुरात एका आयसीटीसी केंद्राने संबंधित महिलेला एचआयव्ही पॉझिटिव्ह असल्याचा खोटा अहवाल दिल्याचा आरोप करण्यात आला आहे. सरकारी अनुदान मिळवण्यासाठीच हा बनावट अहवाल देण्यात आल्याचा संशय सामाजिक कार्यकर्त्यांनी व्यक्त केला आहे. विशेष म्हणजे, ही महिला त्या वेळी सात महिन्यांची गर्भवती होती.
यानंतर तिच्या पतीचा तसेच गर्भातील बाळाचा तपास पाच वेळा करण्यात आला आणि सर्व अहवाल निगेटिव्ह आले. संशय आल्याने संबंधित महिलेने इतर खाजगी प्रयोगशाळांमध्ये चाचण्या केल्या असता, तेथेही अहवाल निगेटिव्हच आले. त्यामुळे या संपूर्ण प्रकारातील गंभीरता अधिकच वाढली आहे.
सासरकडून घराबाहेर काढले
खोट्या अहवालाच्या आधारावर महिलेच्या सासरच्यांनी तिला घराबाहेर काढले. या घटनेमुळे तिचा संसार अक्षरशः उद्ध्वस्त झाला असून, ती सध्या कुटुंबापासून दूर राहत आहे. एका चुकीच्या अहवालामुळे एका कुटुंबाचे आयुष्य कसे विस्कळीत होऊ शकते, याचे हे ज्वलंत उदाहरण ठरले आहे.
चौकशी समितीची नियुक्ती
या प्रकरणाची दखल घेत त्रिसदस्यीय चौकशी समिती नेमण्यात आली आहे. जिल्हा शल्य चिकित्सक डॉ. वर्षा डोईफोडे यांनी या घटनेची गंभीर दखल घेतली असून, दोषींवर कठोर कारवाई केली जाईल, असे स्पष्ट केले आहे.
दरम्यान, संबंधितांवर कारवाई न झाल्यास १ मे रोजी मुख्यमंत्री कार्यालयासमोर आत्मदहन करण्याचा इशारा पीडित महिलेकडून देण्यात आला आहे. त्यामुळे या प्रकरणाकडे राज्याचे लक्ष लागले असून, पुढील कारवाईकडे सर्वांचे लक्ष केंद्रित झाले आहे.
