यंदाची होळी २०२६ ज्योतिषीय गणनेमुळे विशेष ठरत आहे. फाल्गुन पौर्णिमेला साजरा होणाऱ्या या सणावर यावेळी भद्रा आणि चंद्रग्रहणाचे सावट असल्याने होलिका दहनाच्या वेळेबाबत संभ्रम निर्माण झाला आहे. पौर्णिमा २ मार्च २०२६ रोजी सायंकाळी सुरू होऊन ३ मार्च रोजी सायंकाळी समाप्त होत असली तरी २ मार्चच्या सायंकाळपासून भद्रा सुरू होत असल्याने त्या काळात दहन करणे शास्त्रानुसार टाळावे, असे मत व्यक्त केले जात आहे.
दरम्यान, ३ मार्च रोजी चंद्रग्रहणही असल्याने सकाळपासून सायंकाळपर्यंत सुतक प्रभावी राहणार आहे. ग्रहणाचा मोक्ष सायंकाळी झाल्यानंतरच धार्मिक विधी करण्यास मान्यता दिली जाते. त्यामुळे भद्रा संपल्यानंतर आणि सुतक काळ समाप्त झाल्यानंतरचा प्रदोषकाळ अधिक शुभ मानला जात आहे.
अनेक पंचांग आणि ज्योतिषांच्या मतानुसार ३ मार्च २०२६ रोजी सूर्यास्तानंतर होलिका दहन करणे अधिक योग्य ठरेल. त्यानंतर ४ मार्च रोजी रंगांची धूम म्हणजेच धुलिवंदन साजरे करण्याची शिफारस केली जात आहे.भद्रा आणि ग्रहणाच्या योगामुळे यंदा पंचांगांमध्ये मतभेद दिसत असले तरी भद्रामुक्त आणि सुतकमुक्त काळातच होलिका दहन करण्यावर भर दिला जात आहे. त्यामुळे ३ मार्चची संध्याकाळ हा काळ सर्वाधिक अनुकूल मानला जात आहे.