चंद्रपूर : जिल्ह्यातील एका थरारक प्रकरणाने राज्यभरात खळबळ उडवली आहे. स्वतःच्या वडिलांचा खून करून त्याच जागेवर अनुकंपा तत्त्वावर पोलीस नोकरी मिळवणाऱ्या मुलीचा धक्कादायक कारनामा तीन वर्षांनंतर उघडकीस आला आहे. या प्रकरणात तिच्या प्रियकरासह एकूण चार जणांना अटक करण्यात आली आहे.
रामनगर पोलीस ठाण्याच्या हद्दीत 25 एप्रिल 2023 रोजी हेड कॉन्स्टेबल जयंत बाल्लावार यांचा संशयास्पद मृत्यू झाला होता. त्या वेळी हा मृत्यू अपघाती असल्याचे मानण्यात आले होते. मात्र, 23 मार्च 2026 रोजी या घटनेमागील भयानक सत्य समोर आले.
तपासात उघड झाले की, मृतांची मुलगी आर्या बाल्लावार हिचे आशिष शेडमाके याच्यासोबत प्रेमसंबंध होते. या नात्याला वडिलांचा कडाडून विरोध होता. यामुळे त्रस्त झालेल्या या दोघांनी मिळून जयंत बाल्लावार यांची हत्या करण्याचा कट रचला.
यासाठी त्यांनी चैतन्य गेडाम याच्याकडून 5 हजार रुपयांत विष मिळवले. 25 एप्रिल 2023 रोजी आर्याने आपल्या वडिलांना मिल्कशेकमधून हे विष दिले. विषप्रयोगानंतर त्यांची प्रकृती बिघडली आणि त्यांचा मृत्यू झाला.
घटनेनंतर आर्याने पोलिसांची दिशाभूल करत सहानुभूती मिळवली आणि अनुकंपा तत्त्वावर पोलीस दलात नोकरी मिळवली. पुढे 2025 मध्ये ती आणि आशिष दोघेही पोलीस दलात दाखल झाले होते.
मात्र, गेल्या काही महिन्यांपासून त्यांच्यातील संबंध बिघडू लागले. सततच्या वादातून घाबरलेल्या आशिषने अखेर रामनगर पोलीस ठाण्यात जाऊन हत्येची कबुली दिली. त्यानंतर पोलिसांनी जुन्या प्रकरणाचा फेरतपास केला असता, मृत्यू विषप्रयोगामुळेच झाल्याचे स्पष्ट झाले.
या प्रकरणात आर्या बाल्लावार, आशिष शेडमाके, चैतन्य गेडाम आणि एका अल्पवयीन मुलाविरुद्ध गुन्हा दाखल करण्यात आला आहे. चौघांनाही अटक करण्यात आली असून न्यायालयाने त्यांना पोलीस कोठडी सुनावली आहे. अल्पवयीन आरोपीला बालसुधारगृहात पाठवण्याची प्रक्रिया सुरू आहे.
या घटनेमुळे पोलीस दलाच्या प्रतिमेला धक्का बसला असून, या प्रकरणाचा पुढील तपास पोलीस करत आहेत.
