नवी दिल्ली : भारतीय टेनिसमधील प्रसिद्ध खेळाडू लिएंडर पेस यांनी भारतीय जनता पक्षात प्रवेश करत राजकारणात पाऊल ठेवले आहे. दिल्लीत झालेल्या कार्यक्रमात केंद्रीय मंत्री किरेन रिजिजू आणि पक्ष नेते सुकांत मजुमदार यांच्या उपस्थितीत त्यांनी पक्षाचे सदस्यत्व स्वीकारले. पश्चिम बंगाल विधानसभा निवडणुकांच्या पार्श्वभूमीवर या निर्णयाला विशेष महत्त्व प्राप्त झाले आहे.
यावेळी बोलताना किरेन रिजिजू यांनी पेस यांचे स्वागत करत हा क्षण महत्त्वपूर्ण असल्याचे सांगितले. पंतप्रधान नरेंद्र मोदी यांनी गेल्या काही वर्षांत क्रीडा क्षेत्राला मोठे प्रोत्साहन दिल्याचे त्यांनी नमूद केले.
पक्षप्रवेशानंतर पेस यांनी आपल्या भावना व्यक्त करत हा दिवस आयुष्यातील महत्त्वाचा टप्पा असल्याचे सांगितले. त्यांनी नरेंद्र मोदी आणि अमित शहा यांचे आभार मानले. गेली चार दशके देशासाठी खेळल्यानंतर आता तरुणांसाठी आणि क्रीडा क्षेत्रासाठी काम करण्याची संधी मिळाल्याचे त्यांनी सांगितले.
कोलकाता येथे जन्मलेल्या पेस यांनी पश्चिम बंगालमधील क्रीडा सुविधांवरही भाष्य केले. राज्यात अद्याप पुरेशा क्रीडा सुविधा विकसित झालेल्या नसल्याचे त्यांनी अधोरेखित केले. विशेषतः बंदिस्त टेनिस मैदाने कमी असल्याचे त्यांनी सांगितले. पुढील काळात क्रीडा शिक्षणावर अधिक भर देण्याची गरज असल्याचेही त्यांनी नमूद केले. महिलांसाठी समान संधी देणाऱ्या शिष्यवृत्ती योजनेचे स्वप्नही त्यांनी व्यक्त केले.
लिएंडर पेस यांची कारकीर्द अत्यंत उल्लेखनीय राहिली आहे. १९९६ मधील अटलांटा ऑलिम्पिकमध्ये त्यांनी कांस्यपदक पटकावले होते. तसेच दुहेरी गटात आठ वेळा आणि मिश्र दुहेरीत दहा वेळा विजेतेपद मिळवत त्यांनी मोठी कामगिरी केली आहे. खेलरत्न, अर्जुन पुरस्कार, पद्मश्री आणि पद्मभूषण यांसारख्या सन्मानांनी त्यांना गौरविण्यात आले आहे.
दरम्यान, त्यांच्या या निर्णयामुळे विशेषतः तरुण आणि क्रीडाप्रेमी मतदारांमध्ये सकारात्मक प्रतिसाद मिळण्याची शक्यता व्यक्त केली जात आहे. आगामी निवडणुकांत ते प्रत्यक्ष रिंगणात उतरणार की प्रचारात सक्रिय भूमिका बजावणार, याबाबत उत्सुकता निर्माण झाली आहे.