नागपूर : शहरातील यशवंत स्टेडियम परिसरात सोमवारी पहाटे 4 वाजताच्या सुमारास भीषण आगीची घटना घडली. बस डेपोच्या शेजारी असलेल्या संगमचाळ झोपडपट्टीत सुमारे पहाटे चारच्या सुमारास अचानक आग भडकली आणि काही क्षणांतच आगीने भीषण रूप धारण केले. या दुर्घटनेत पाच झोपड्या पूर्णपणे जळून खाक झाल्या असून घरातील मोठ्या प्रमाणावर साहित्य राख झाले आहे.
मिळालेल्या माहितीनुसार, पहाटेच्या शांततेत झोपडपट्टी भागातून धुराचे लोट आणि ज्वाळा उसळताना दिसताच रहिवाशांमध्ये एकच खळबळ उडाली. आग झपाट्याने पसरू लागल्याने अनेकांनी घाईघाईने घराबाहेर पडत स्वतःचा व कुटुंबियांचा जीव वाचवला. काही रहिवाशांनी तत्काळ मदतीसाठी आरडाओरड करत इतरांना सावध केले.
घटनेची माहिती मिळताच अग्निशमन दलाचे पथक तातडीने घटनास्थळी दाखल झाले. जवानांनी वेगाने कारवाई करत आगीवर नियंत्रण मिळवले. मात्र, तोपर्यंत पाच झोपड्या आगीत भस्मसात झाल्या होत्या.
या आगीत कपडे, भांडी, अन्नधान्य तसेच घरगुती वापरातील इतर साहित्य जळून खाक झाले. सुदैवाची बाब म्हणजे या दुर्घटनेत कोणतीही जीवितहानी झाल्याचे वृत्त नाही.
दरम्यान, आग नेमकी कशामुळे लागली याचे कारण अद्याप स्पष्ट झालेले नसून अग्निशमन दल आणि पोलिसांकडून या घटनेचा पुढील तपास सुरू आहे. पहाटेच्या अंधारात घडलेल्या या घटनेमुळे परिसरात काही काळ भीती आणि खळबळ पसरली होती.
