नागपूर (कामठी) : उधारीच्या पैशांवरून झालेल्या किरकोळ वादाने गंभीर रूप घेत कामठी परिसरात एका तरुणावर चाकूने हल्ला करण्यात आल्याची घटना उघडकीस आली आहे. पिली हवेली चौकातील एका हॉटेलजवळ घडलेल्या या प्रकारात तरुण गंभीर जखमी झाला आहे.
मिळालेल्या माहितीनुसार, फिर्यादी मुमताज अहमद कोळसाटाळ हे मित्र मोईनुद्दीन सलाउद्दीन शेख यांच्यासह पिली हवेली चौकात उभे असताना इस्माईलपुरा येथील शफिक मोहम्मद रफीक अन्सारी तेथे आला. यावेळी मोईनुद्दीन यांनी त्याच्याकडे थकबाकीची मागणी केली. यावरून दोघांमध्ये तीव्र वाद निर्माण झाला.
वाद चिघळताच आरोपीने संतापाच्या भरात आपल्या वाहनाच्या डिकीतून चाकू काढत मोईनुद्दीन यांच्या छातीच्या खाली वार केला. या हल्ल्यात ते गंभीर जखमी झाले.
घटनेची माहिती मिळताच पोलिसांनी तत्काळ घटनास्थळी पोहोचून जखमीला उपचारासाठी रुग्णालयात हलविले. दरम्यान, आरोपीला अटक करण्यात आली असून घटनास्थळावरून रक्ताने माखलेला चाकू जप्त करण्यात आला आहे.
या प्रकरणी जुनी कामठी पोलिसांनी गुन्हा दाखल केला असून पुढील तपास सुरू आहे.