नागपूर : आदिवासी परंपरा, कला आणि जीवनशैलीचा जवळून अनुभव घेण्याची संधी देणारी “कुंवारा भिवसेन आदिवासी लोककला व सांस्कृतिक प्रदर्शनी २०२६” ही भव्य प्रदर्शनी १८ ते २० एप्रिलदरम्यान पारशिवनी मैदानावर रंगणार आहे.
नागपूर प्रेस क्लबमध्ये घेतलेल्या पत्रकार परिषदेत मंत्री आशीष जैस्वाल यांनी या कार्यक्रमाची माहिती दिली. आदिवासी संस्कृतीचे जतन आणि प्रसार हा या उपक्रमामागचा मुख्य उद्देश असल्याचे त्यांनी स्पष्ट केले. तसेच, नागरिकांनी मोठ्या संख्येने उपस्थित राहून या उपक्रमाला प्रतिसाद द्यावा, असे आवाहनही त्यांनी केले.
या प्रदर्शनात आदिवासी समाजातील विविध पारंपरिक कला, हस्तकला, नृत्यप्रकार, वादन आणि खाद्यसंस्कृती यांचे सजीव दर्शन घडणार आहे. रंगोळी, मेहंदी आणि पारंपरिक वेशभूषा अशा विविध स्पर्धा आयोजित करण्यात आल्या असून, पर्यटकांसाठी सायकल व बोट सफर तसेच हॉट एअर बलूनसारखी आकर्षणेही उपलब्ध असतील.
कार्यक्रमात गोंड, कोरकू, गोंडी आणि भिल्ल समाजांच्या पारंपरिक नृत्यांचे सादरीकरण होणार असून, राज्यातील विविध भागांतील कलाकार यात सहभागी होणार आहेत.
मनोरंजनाचा खास तडका म्हणून १८ एप्रिल रोजी शन्मुख प्रिया यांचा गायन कार्यक्रम, १९ एप्रिल रोजी हेमा मालिनी यांचे ‘द्रौपदी’ नृत्यनाट्य आणि २० एप्रिल रोजी कैलाश खेर यांचा लाईव्ह म्युझिक कॉन्सर्ट आयोजित करण्यात आला आहे.
तसेच, आदिवासी बांधवांसाठी विविध शासकीय योजनांची माहिती देणारे विशेष स्टॉल्सही उभारण्यात येणार आहेत.
आदिवासी संस्कृतीचा वारसा जपण्याच्या उद्देशाने आयोजित या प्रदर्शनाला नागरिकांनी उत्स्फूर्त प्रतिसाद द्यावा, असे आवाहन आयोजकांकडून करण्यात आले आहे.