मुंबई- सराफा बाजारात आज सोन्या-चांदीच्या दरांनी नवे उच्चांक गाठले असून गुंतवणूकदारांसह ग्राहकांचे लक्ष वेधले आहे. आजच्या व्यवहारात चांदीच्या दरात एका झटक्यात १४,४७५ रुपयांची मोठी वाढ झाली, तर सोन्याच्या किमतीत २,८८३ रुपयांची तेजी नोंदवली गेली. या दरवाढीमुळे दोन्ही मौल्यवान धातूंनी आतापर्यंतचे सर्व विक्रम मोडीत काढले आहेत.
आज जीएसटीशिवाय चांदीचा दर २,५७,२८३ रुपये प्रति किलोवर पोहोचला असून, जीएसटीसह चांदीची किंमत थेट २,६५,००१ रुपये प्रति किलोवर गेली आहे. दुसरीकडे, २४ कॅरेट सोन्याचा दर जीएसटीशिवाय १,४०,००५ रुपये प्रति १० ग्रॅमवर उघडला, तर जीएसटीसह सोन्याची किंमत १,४४,२०५ रुपये प्रति १० ग्रॅम इतकी झाली आहे.
जुन्या उच्चांकांना मागे टाकले-
शुक्रवारी जीएसटीशिवाय चांदी २,४२,८०८ रुपये प्रति किलोवर बंद झाली होती. आजच्या दरवाढीमुळे चांदीने ७ जानेवारीचा २,४८,००० रुपयांचा उच्चांकही मोठ्या फरकाने पार केला आहे. त्याचप्रमाणे, जीएसटीशिवाय सोने शुक्रवारी १,३७,१२२ रुपये प्रति १० ग्रॅमवर बंद झाले होते. आज सोन्याने २९ डिसेंबर २०२५ रोजीचा १,३८,१८१ रुपयांचा ‘ऑल टाइम हाय’ रेकॉर्ड मोडला आहे.
हे सर्व दर इंडियन बुलियन अँड ज्वेलर्स असोसिएशन (IBJA)कडून जाहीर करण्यात आले असून, IBJA दिवसातून दोन वेळा अधिकृत दर प्रसिद्ध करते.
कॅरेटप्रमाणे सोन्याचे आजचे दर-
२३ कॅरेट सोने: २,८७१ रुपयांच्या वाढीसह १,३९,४४४ रुपये प्रति १० ग्रॅम (जीएसटीसह १,४३,६२७ रुपये)
२२ कॅरेट सोने: २,६४१ रुपयांनी महाग होऊन १,२८,२४५ रुपये प्रति १० ग्रॅम (जीएसटीसह १,३२,०९२ रुपये)
१८ कॅरेट सोने: २,१६२ रुपयांची वाढ, दर १,०५,००४ रुपये प्रति १० ग्रॅम (जीएसटीसह १,०८,१५४ रुपये)
१४ कॅरेट सोने: १,६८७ रुपयांची तेजी, दर ८१,९०३ रुपये प्रति १० ग्रॅम (जीएसटीसह ८४,३६० रुपये)
दरम्यान सतत वाढणारी आंतरराष्ट्रीय बाजारातील अनिश्चितता, डॉलरमधील हालचाल आणि सुरक्षित गुंतवणुकीकडे वाढलेला ओढा यामुळे सोन्या-चांदीच्या दरांमध्ये ही मोठी उसळी पाहायला मिळत असल्याचे बाजारतज्ज्ञांचे मत आहे.