पाटणा : अलीकडील विधानसभा निवडणुकीत एनडीएला बहुमत मिळाल्यानंतर पुन्हा एकदा मुख्यमंत्रीपदाची धुरा सांभाळणारे नितीश कुमार आता मोठा राजकीय निर्णय घेण्याच्या तयारीत असल्याची चर्चा रंगली आहे. बिहारच्या सत्ताकारणात लवकरच बदल होऊ शकतो, असे संकेत मिळत आहेत.
विश्वसनीय सूत्रांच्या माहितीनुसार, नितीश कुमार दिल्लीच्या राजकारणात सक्रिय होण्यासाठी राज्यसभेचा मार्ग स्वीकारू शकतात. त्यांनी मुख्यमंत्रीपदाचा राजीनामा दिल्यास राज्यातील नेतृत्वात मोठी उलथापालथ होण्याची शक्यता आहे. यामुळे मुख्यमंत्रीपदाची खुर्ची रिक्त होईल आणि नव्या चेहऱ्याची निवड अपरिहार्य ठरेल.
दरम्यान, त्यांच्या पुत्र निशांत कुमार यांच्या नावाचीही जोरदार चर्चा सुरू आहे. आधी त्यांना राज्यसभेवर पाठवण्याची शक्यता व्यक्त होत होती; मात्र आता त्यांना उपमुख्यमंत्रिपदाची जबाबदारी दिली जाऊ शकते, अशी माहिती समोर येत आहे. त्यामुळे बिहारमध्ये नेतृत्वाच्या पातळीवर पिढीबदलाची चिन्हे दिसू लागली आहेत.
या संभाव्य बदलांच्या पार्श्वभूमीवर भाजपकडून मुख्यमंत्रीपदासाठी दावा मजबूत केला जाऊ शकतो, अशी राजकीय वर्तुळात चर्चा आहे. एनडीएतील सत्तासंतुलनावर या निर्णयाचा थेट परिणाम होण्याची शक्यता वर्तवली जात आहे.
जेडीयूचे कार्यकारी अध्यक्ष संजय झा दिल्लीहून पटनाला रवाना झाल्याने या हालचालींना अधिक वेग आला आहे. पक्षांतर्गत महत्त्वाची बैठक बोलावण्यात आल्याची माहिती असून, त्यात पुढील राजकीय दिशा निश्चित होऊ शकते.
एकंदरीत, बिहारच्या राजकारणात सध्या अनिश्चिततेचे वातावरण असून, येत्या काही दिवसांत मोठी घोषणा होण्याची शक्यता नाकारता येत नाही.
