नागपूर : महर्षी व्यास सभागृहात आयोजित भारतीय युवा संसदच्या २९व्या राष्ट्रीय अधिवेशनात उपराष्ट्रपती सी. पी. राधाकृष्णन यांनी युवकांशी संवाद साधताना “भारतीय भाषा आणि विकसित भारत २०४७” या विषयावर भर दिला. देशाच्या सर्वांगीण प्रगतीसाठी मातृभाषेतून विचार करणे आणि व्यक्त होणे अत्यंत गरजेचे असल्याचे त्यांनी सांगितले.
नागपूरच्या ऐतिहासिक वारशाचा उल्लेख करताना त्यांनी डॉ. केशव बळीराम हेडगेवार यांनी स्थापन केलेल्या राष्ट्रीय स्वयंसेवक संघामुळे शहराला राष्ट्रीय स्तरावर वेगळी ओळख मिळाल्याचे नमूद केले. ‘राष्ट्र प्रथम’ या भावनेतून उभी राहिलेली ही चळवळ देशाच्या एकात्मतेचे प्रतीक असल्याचे त्यांनी स्पष्ट केले.
युवा संसद राष्ट्रीय न्यासाच्या कार्याचे कौतुक करत त्यांनी सांगितले की, या माध्यमातून देशभरातील युवक एकत्र येऊन लोकशाही मूल्यांचा अनुभव घेत आहेत. ‘एक भारत, श्रेष्ठ भारत’ ही संकल्पना प्रत्यक्षात आणण्यासाठी अशा उपक्रमांची मोठी भूमिका असल्याचे त्यांनी सांगितले.
२०४७ पर्यंत विकसित भारत घडवण्यासाठी भारतीय भाषा, संस्कृती आणि परंपरांवर आधारित विचारसरणी स्वीकारणे आवश्यक असल्याचे त्यांनी अधोरेखित केले. परकीय प्रभावापेक्षा स्वदेशी दृष्टिकोनातून नवकल्पना घडवण्याचे आवाहन त्यांनी केले.
लोकशाहीत संवादाला विशेष महत्त्व असून मतभेद असले तरी त्यातून विधायक मार्ग निघणे आवश्यक असल्याचे त्यांनी नमूद केले. युवा संसद ही युवकांमध्ये नेतृत्व, शिस्त आणि राष्ट्रसेवेची भावना निर्माण करणारे प्रभावी व्यासपीठ असल्याचे त्यांनी सांगितले.
यावेळी त्यांनी विद्यार्थ्यांना ‘अमृत पिढी’ असे संबोधत विकसित भारत घडवण्याची जबाबदारी त्यांच्या खांद्यावर असल्याचे सांगितले. या उद्दिष्टपूर्तीत युवा संसद मोलाची भूमिका बजावेल, असा विश्वास त्यांनी व्यक्त केला.
कार्यक्रमापूर्वी उपराष्ट्रपतींनी डॉ. हेडगेवार स्मृती भवन येथे भेट देऊन त्यांच्या समाधीस्थळी अभिवादन केले. या कार्यक्रमाला राज्यपाल श्री जिष्णू देव वर्मा, मंत्री श्री चंद्रशेखर बावनकुळे यांच्यासह विविध मान्यवर आणि देशभरातून आलेले युवक उपस्थित होते.
