नागपूर : शहरात अमली पदार्थांविरोधात पोलिसांनी मोठी कारवाई करत आंतरराज्यीय गांजा तस्करी करणाऱ्या टोळीचा भंडाफोड केला आहे. गुन्हे शाखेच्या युनिट क्रमांक ४ ने ‘थंडर स्ट्राईक’ मोहिमेंतर्गत सक्करदरा परिसरातील आशीर्वाद नगर येथे छापा टाकत ही कारवाई अंजाम दिली.
गुप्त माहितीच्या आधारे करण्यात आलेल्या या धाडीत तीन आरोपींना अटक करण्यात आली असून त्यांच्या ताब्यातून ४ किलोहून अधिक गांजा जप्त करण्यात आला आहे. जप्त मालाची किंमत एक लाख रुपयांपेक्षा जास्त असल्याचे पोलिसांनी सांगितले. याशिवाय मोबाईल फोन, रोख रक्कम आणि विक्रीसाठी वापरण्यात येणारे साहित्यही जप्त करण्यात आले आहे.
तपासादरम्यान समोर आले की, अटक आरोपींचे मूळ संबंध हैदराबाद आणि मुंबई येथील आहेत. त्यामुळे हा केवळ स्थानिक गुन्हा नसून मोठ्या आंतरराज्यीय नेटवर्कचा भाग असल्याचे स्पष्ट झाले आहे. आरोपी नागपूरमधून गांजा घेऊन तेलंगणात पाठवण्याच्या तयारीत होते, मात्र पोलिसांनी वेळेत सापळा रचत त्यांचा कट उधळला.
या प्रकरणात आणखी दोन आरोपी फरार असून त्यांचा शोध सुरू आहे. अटक करण्यात आलेल्यांमध्ये मोहम्मद समीर, शेख अब्दुल आणि मोहम्मद अकबर यांचा समावेश आहे, तर मोहम्मद जहाँगीर आणि अज्जू हे अद्याप फरार आहेत.
गुन्हे शाखेच्या अधिकाऱ्यांनी दिलेल्या माहितीनुसार, संपूर्ण नेटवर्कचे धागेदोरे शोधण्यासाठी सखोल तपास सुरू असून फरार आरोपींनाही लवकरच अटक केली जाईल. या कारवाईनंतर शहरातील अमली पदार्थ तस्करांमध्ये भीतीचे वातावरण निर्माण झाले आहे.
