नागपूर : शहरातील एमआयडीसी पोलीस ठाण्याच्या हद्दीत येणाऱ्या म म मतश्री नगर परिसरात गुरुवारी मध्यरात्रीच्या सुमारास घडलेल्या भीषण घटनेने खळबळ उडाली आहे. अल्पवयीन मुलीसोबत असलेल्या मैत्रीवरून निर्माण झालेल्या वादातून एका तरुणाने आपल्या साथीदारांच्या मदतीने एसआरपीएफमध्ये चालक म्हणून कार्यरत असलेल्या पोलीस शिपायाची निर्घृण हत्या केली.
पंकज ठाकूर (४२) असे मृत्यू झालेल्या शिपायाचे नाव असून, या हल्ल्यात त्यांचे मेहुणे अर्पित (३०) गंभीर जखमी झाले आहेत. त्यांच्यावर सध्या रुग्णालयात उपचार सुरू असल्याची माहिती पोलिसांनी दिली.
मिळालेल्या माहितीनुसार, मुख्य आरोपी आकाश हरिदास मंडल (२३) याचे ठाकूर यांच्या अल्पवयीन मुलीसोबत काही महिन्यांपासून संबंध होते. या मैत्रीला ठाकूर यांनी ठाम विरोध दर्शवला होता. अनेकदा समज देऊनही आकाश मागे हटत नसल्याने घरात तणावाचे वातावरण होते.
दरम्यान, गुरुवारी रात्री हनुमान जयंतीनिमित्त परिसरातील मंदिरात कार्यक्रम सुरू असताना आकाश पुन्हा त्या मुलीशी बोलताना ठाकूर यांच्या नजरेस पडला. यावरून दोघांमध्ये तीव्र वाद झाला. त्यानंतर आकाश तेथून निघून गेला, मात्र काही वेळातच तो आपल्या मित्रांसह परत आला.
हल्लेखोरांच्या हातात लोखंडी सळई आणि धारदार शस्त्रे होती. अचानक हल्ला चढवत आकाशने ठाकूर यांच्या छातीत सळई खुपसली, तर इतर आरोपींनीही त्यांच्यावर वार केले. वाद शांत करण्यासाठी पुढे आलेल्या अर्पित यांनाही आरोपींनी बेदम मारहाण केली.
या घटनेनंतर परिसरात भीतीचे वातावरण निर्माण झाले. जखमी अवस्थेत दोघांना तातडीने रुग्णालयात दाखल करण्यात आले. मात्र, डॉक्टरांनी पंकज ठाकूर यांना मृत घोषित केले.
दरम्यान, पोलिसांनी तात्काळ कारवाई करत मुख्य आरोपी आकाश मंडलसह एकूण पाच जणांना अटक केली आहे. या प्रकरणी खुनाचा गुन्हा दाखल करण्यात आला असून पुढील तपास सुरू आहे.
