तरनतारन (पंजाब): पंजाबच्या तरनतारन जिल्ह्यातील एका लॉ कॉलेजसमोर मंगळवारी दुपारी घडलेल्या थरारक घटनेने संपूर्ण परिसर हादरून गेला. कॉलेजच्या मुख्य प्रवेशद्वाराजवळ एका विद्यार्थ्याला लक्ष्य करत अज्ञात व्यक्तीने थेट गोळीबार केला. या हल्ल्यात विद्यार्थ्याचा जागीच मृत्यू झाला. हत्येनंतर आरोपीने स्वतःवर गोळी झाडून आत्महत्येचा प्रयत्न केला.
प्राथमिक माहितीनुसार, कॉलेज परिसरात वर्दळ असतानाच हा गोळीबार झाल्याने विद्यार्थ्यांमध्ये आणि नागरिकांमध्ये एकच खळबळ उडाली. गंभीर जखमी अवस्थेत हल्लेखोराला तातडीने रुग्णालयात दाखल करण्यात आले असून त्याची प्रकृती अत्यंत चिंताजनक असल्याचे वैद्यकीय सूत्रांनी सांगितले.
घटनेची माहिती मिळताच पोलीस घटनास्थळी दाखल झाले. मृत विद्यार्थ्याचा मृतदेह ताब्यात घेऊन शवविच्छेदनासाठी पाठवण्यात आला आहे. परिसरातील सीसीटीव्ही फुटेज तपासले जात असून प्रत्यक्षदर्शींचे जबाब नोंदवण्याचे काम सुरू आहे.
या घटनेमागचे नेमके कारण अद्याप स्पष्ट झालेले नाही. प्रेमसंबंध, वैयक्तिक वाद किंवा अन्य कोणत्या कारणातून हा प्रकार घडला का, याबाबत पोलीस सखोल तपास करत आहेत. आरोपी आणि मृत विद्यार्थ्याच्या मोबाईल कॉल रेकॉर्ड्स तसेच सोशल मीडिया हालचालींचीही चौकशी सुरू आहे.
दरम्यान, वापरलेले शस्त्र बेकायदेशीर होते का आणि ते आरोपीकडे कसे आले, याचाही तपास केला जात आहे. या घटनेमुळे पंजाबमधील कायदा-सुव्यवस्था आणि शैक्षणिक संस्थांच्या सुरक्षेचा मुद्दा पुन्हा एकदा ऐरणीवर आला आहे.
