मुंबई: शहरातील कुर्ला परिसरात रविवारी उशिरा रात्री झालेल्या गोळीबाराच्या घटनेने एकच खळबळ उडाली आहे. माकडवाला कंपाऊंड परिसरात अज्ञात हल्लेखोरांनी कुख्यात गुंड बाबा यल्लाप्पा पवार याच्यावर जीवघेणा हल्ला चढवून त्याची हत्या केल्याची धक्कादायक घटना समोर आली आहे.
प्राथमिक माहितीनुसार, हल्लेखोरांनी पवार याच्यावर एकामागून एक पाच गोळ्या झाडल्या. एवढ्यावरच न थांबता त्याच्यावर धारदार शस्त्रानेही वार करण्यात आले, ज्यामुळे तो गंभीर जखमी झाला. रक्ताच्या थारोळ्यात पडलेल्या पवारला तातडीने जवळील भाभा रुग्णालय येथे उपचारासाठी दाखल करण्यात आले. मात्र, डॉक्टरांनी तपासणीनंतर त्याला मृत घोषित केले.
या घटनेमुळे परिसरात भीतीचे वातावरण निर्माण झाले असून, नागरिकांमध्ये दहशतीचे सावट पसरले आहे. घटनेची माहिती मिळताच पोलिसांनी घटनास्थळी धाव घेतली आणि परिसरात नाकाबंदी करून तपास सुरू केला आहे.
पोलिसांच्या प्राथमिक तपासात हा हल्ला पूर्वीच्या वादातून झाल्याची शक्यता व्यक्त करण्यात येत आहे. हल्लेखोरांची ओळख पटवण्यासाठी सीसीटीव्ही फुटेज आणि स्थानिकांकडून माहिती गोळा केली जात आहे.
दरम्यान, या प्रकरणी गुन्हा दाखल करण्यात आला असून, आरोपींचा शोध घेण्यासाठी विशेष पथकांची नियुक्ती करण्यात आली आहे.
सूचना: या घटनेशी संबंधित दृश्ये अत्यंत संवेदनशील असल्याने प्रसारण करताना ती ब्लर करूनच वापरण्याचे आवाहन करण्यात आले आहे.
