मुंबई : राष्ट्रवादी काँग्रेसचे ज्येष्ठ नेते शरद पवार यांना आज मुंबईतील ब्रीच कँडी रुग्णालय येथे दाखल करण्यात आले आहे. नियमित वैद्यकीय तपासणी आणि काही आवश्यक चाचण्यांसाठी त्यांना रुग्णालयात नेण्यात आल्याची माहिती देण्यात आली.
यापूर्वीही प्रकृती अस्वस्थतेमुळे गेल्या महिन्यात पवार यांना रुग्णालयात दाखल करण्यात आले होते. उपचारानंतर काही दिवसांत त्यांना डिस्चार्ज देण्यात आला होता.
खासदार सुप्रिया सुळे यांनी सांगितले की, पवार यांना केवळ नियमित तपासणीसाठी रुग्णालयात दाखल केले असून सध्या त्यांच्यावर विविध वैद्यकीय चाचण्या सुरू आहेत. या चाचण्यांचे अहवाल आल्यानंतर त्यांच्या प्रकृतीबाबत अधिक माहिती स्पष्ट होईल.
दरम्यान, नियोजित कार्यक्रमानुसार त्यांचा बारामती दौरा रद्द करण्यात आला आहे. खबरदारीचा उपाय म्हणून त्यांना रुग्णालयात ठेवण्यात आले असून सध्या त्यांची प्रकृती स्थिर असल्याची माहिती देण्यात आली आहे.
