नांदेड : मराठवाड्यातील नांदेड जिल्ह्यात आज दुपारच्या सुमारास भूकंपाचे हलके धक्के जाणवल्याने मुखेड तालुक्यात काही काळ भीतीचे वातावरण पसरले. दुपारी सुमारे ३.१५ वाजता जमिनीखालून गडगडाटासारखा आवाज ऐकू आल्याचे ग्रामस्थांनी सांगितले. त्यानंतर काही क्षण जमीन हलल्याची जाणीव झाल्याने नागरिकांनी तातडीने घराबाहेर पडत सुरक्षित ठिकाणी धाव घेतली.
हिबट, कोळगाव, धामणगाव, मोटरगा, जामखेड, धनज आणि आसपासच्या गावांमध्ये हे धक्के जाणवले. अचानक झालेल्या या प्रकारामुळे नागरिकांमध्ये संभ्रम निर्माण झाला होता. काही काळानंतर परिस्थिती पूर्ववत झाली.
राष्ट्रीय भूकंप विज्ञान केंद्राच्या माहितीनुसार, या भूकंपाची तीव्रता रिश्टर स्केलवर ३.० इतकी नोंदवली गेली आहे. मुखेड तालुक्यातील खपराळा परिसर हा या धक्क्यांचा केंद्रबिंदू असल्याची माहिती समोर आली आहे. या घटनेत कोणतीही जीवितहानी किंवा मालमत्तेचे नुकसान झाले नसल्याचे प्रशासनाने स्पष्ट केले.
तज्ज्ञांच्या मते, जमिनीखालील खडकांच्या हालचालींमुळे ऊर्जा मुक्त होऊन कंपन निर्माण होतात आणि त्यावेळी आवाज ऐकू येऊ शकतो. ३.० तीव्रतेचा भूकंप सौम्य स्वरूपाचा मानला जात असला तरी नागरिकांनी सतर्क राहून अफवांपासून दूर राहावे, असे आवाहन प्रशासनाकडून करण्यात आले आहे.
