देशभरात रंगोत्सवाची धामधूम सुरू असताना वाढत्या महागाईच्या पार्श्वभूमीवर सर्वसामान्यांसाठी दिलासादायक निर्णय जाहीर करण्यात आला आहे. दिल्ली आणि उत्तर प्रदेश सरकारने गरीब व गरजू कुटुंबांसाठी मोफत गॅस सिलिंडर आणि आर्थिक सहाय्याची घोषणा केली आहे. सणासुदीच्या काळात स्वयंपाकघराचा वाढलेला खर्च कमी करण्यासाठी हा निर्णय महत्त्वाचा मानला जात आहे.
होळीच्या निमित्ताने दिल्ली सरकारने थेट गॅस सिलिंडर देण्याऐवजी लाभार्थ्यांच्या बँक खात्यात ८५३ रुपये जमा करण्याचा निर्णय घेतला आहे. यासाठी सुमारे २४२ कोटी रुपयांची तरतूद करण्यात आली असून, राज्यातील अंदाजे १.७५ कोटी रेशनकार्डधारक कुटुंबांना या योजनेचा फायदा होणार आहे. विशेष म्हणजे, पाईपलाईन गॅस कनेक्शन असलेल्या कुटुंबांनाही ही आर्थिक मदत मिळणार आहे.
दरम्यान, उत्तर प्रदेशातील योगी आदित्यनाथ यांच्या नेतृत्वाखालील सरकारने प्रधानमंत्री उज्ज्वला योजना अंतर्गत लाभार्थ्यांना होळी आणि दिवाळी या दोन्ही सणांना मोफत गॅस सिलिंडर रिफिल देण्याची घोषणा केली आहे. लाभार्थ्यांना प्रथम स्वतःच्या पैशाने सिलिंडर खरेदी करावा लागेल आणि त्यानंतर संबंधित रक्कम किंवा अनुदान थेट त्यांच्या बँक खात्यात जमा केले जाईल.
मात्र, करदाते, सरकारी कर्मचारी आणि निवृत्त कर्मचाऱ्यांना या योजनेचा लाभ मिळणार नाही, असे स्पष्ट करण्यात आले आहे.
सणासुदीच्या काळात आर्थिक ओझे कमी करण्यासाठी दोन्ही राज्य सरकारांचे हे पाऊल महत्त्वाचे ठरत असून, नेमकी पात्रता आणि अर्ज प्रक्रिया जाणून घेण्यासाठी संबंधित राज्य सरकारांच्या अधिकृत संकेतस्थळाला भेट देण्याचे आवाहन करण्यात आले आहे.
