गायमुख देवस्थान यात्रेचे यशस्वी आयोजन
तुमसर : महाशिवरात्रीनिमित्त भरलेल्या गायमुख देवस्थान यात्रेत यंदा हजारो भाविकांनी मोठ्या श्रद्धेने सहभाग घेतला. संभाव्य गर्दी लक्षात घेता प्रशासनाने केलेल्या सूक्ष्म नियोजनामुळे संपूर्ण यात्रा अत्यंत सुव्यवस्थित, सुरक्षित आणि शिस्तबद्ध वातावरणात पार पडली. या यशामागे तहसीलदार तथा यात्रा समितीचे अध्यक्ष उपेश अंबादे यांचे प्रभावी आणि कर्तृत्ववान नेतृत्व ठळकपणे अधोरेखित झाले.
यात्रेपूर्वीच उपेश अंबादे यांनी सर्व विभागांची सलग बैठक घेऊन प्रत्येक घटकाची जबाबदारी निश्चित केली. प्रत्यक्ष स्थळी वारंवार भेट देत त्यांनी कामांचा आढावा घेतला व आवश्यक सूचना देऊन अंमलबजावणी काटेकोरपणे सुनिश्चित केली. 'भाविकांची सुरक्षितता आणि सुविधा हीच आमची प्राथमिकता,' या भूमिकेतून त्यांनी संपूर्ण यंत्रणा एकत्रितपणे कार्यरत ठेवली.
जिल्हाधिकारी सावंत कुमार यांच्या मार्गदर्शनाखाली गटविकास अधिकारी नंदकिशोर वाडेकर, पो. नि. नितीन राठोड, उपअभियंता प्रफुल झाडे, राज्य उत्पादन शुल्क विभागाचे पथक, वैद्यकीय अधिकारी व आरोग्य विभाग, नगरपरिषद तुमसर, ग्रामपंचायत आंबागड, वनविभाग, महावितरण विभागाचे अधिकारी, यात्रा समिती सदस्य लिलाधर वाडीभस्मे या सर्व अधिकाऱ्यांनी आणि कर्मचाऱ्यांनी एकदिलाने काम करत आदर्श टीमवर्कचे उदाहरण घालून दिले.
यात्रेदरम्यान कुठलाही अनुचित प्रकार घडला नाही. गर्दी असूनही शिस्तबद्ध वातावरण राखण्यात प्रशासन यशस्वी ठरले. 'यंदाची व्यवस्था अत्यंत उत्कृष्ट होती,' अशी प्रतिक्रिया अनेक भाविकांनी व्यक्त केली. तहसीलदार उपेश अंबादे यांच्या सक्षम नेतृत्वाखाली सर्व विभागांनी दाखवलेला समन्वय, जबाबदारीची जाणीव आणि लोकसेवेची तळमळ ही खऱ्या अर्थाने प्रेरणादायी झुरली आहे. गायमुख देवस्थान यात्रेचे हे यश प्रशासनाच्या कार्यक्षमता आणि जनतेप्रती असलेल्या बांधिलकीचे द्योतक ठरत आहे.
