अयोध्या : अयोध्यासह राज्यातील १९ जिल्ह्यांतील न्यायालयांना बॉम्बस्फोटाची धमकी देणारा ईमेल प्राप्त झाल्याने खळबळ उडाली आहे. या घटनेनंतर सर्व न्यायालय परिसर तत्काळ रिकामे करण्यात आले असून सुरक्षा यंत्रणा सतर्क करण्यात आली आहे.
धमकीचा संदेश मिळताच न्यायालयातील न्यायाधीश, वकील, कर्मचारी आणि नागरिकांना बाहेर काढण्यात आले. त्यानंतर बॉम्ब निकामी पथक आणि श्वान पथकांनी संपूर्ण परिसराची सखोल तपासणी सुरू केली. कोणतीही संशयास्पद वस्तू आढळते का, यासाठी प्रत्येक इमारतीची छाननी करण्यात येत आहे.
या पार्श्वभूमीवर पोलिस प्रशासनाने मोठा बंदोबस्त तैनात केला असून न्यायालय परिसरात प्रवेशावर निर्बंध घालण्यात आले आहेत. मुख्य न्यायदंडाधिकारी यांनी सुरक्षा व्यवस्थेवर स्वतः लक्ष ठेवले असून वरिष्ठ पोलिस अधिकाऱ्यांच्या मार्गदर्शनाखाली तपास सुरू आहे.
धमकीचा ईमेल कोणी पाठवला आणि त्यामागील हेतू काय, याचा शोध घेण्यासाठी सायबर पथकही तपासात सहभागी झाले आहे. नागरिकांनी अफवांवर विश्वास ठेवू नये आणि अधिकृत माहितीचीच दखल घ्यावी, असे आवाहन प्रशासनाकडून करण्यात आले आहे.
