अहमदाबाद : अहमदाबाद येथे गेल्या वर्षी १२ जून रोजी घडलेल्या एअर इंडियाच्या भीषण विमान दुर्घटनेच्या तपासादरम्यान इटलीतील एका वृत्तपत्राने मोठा दावा केला आहे. इटालियन दैनिक *‘कोरिएरे डेला सेरा’*च्या अहवालानुसार, विमान कोसळण्यामागे पायलटने जाणूनबुजून फ्यूल (इंधन) स्विच बंद केल्याची शक्यता तपासात व्यक्त करण्यात आली आहे. मात्र, भारतीय तपास यंत्रणांकडून या दाव्याची अद्याप कोणतीही अधिकृत पुष्टी करण्यात आलेली नाही.
मीडिया रिपोर्टमध्ये काय म्हटले आहे?
सदर अहवालात पश्चिमेकडील विमानन संस्थांशी संबंधित सूत्रांच्या हवाल्याने दावा करण्यात आला आहे की, अंतिम अहवाल तयार करणाऱ्या भारतीय तपासकर्त्यांच्या निष्कर्षांमध्ये पायलटनेच इंधन स्विच बंद केल्याचा उल्लेख असू शकतो. तपासात विमानात कोणताही तांत्रिक बिघाड आढळला नसल्याचे नमूद करण्यात आले आहे.
कॉकपिट व्हॉइस रेकॉर्डरमधील संभाषणाच्या आधारे हा अंदाज व्यक्त करण्यात आला आहे. रेकॉर्डिंगनुसार, एका पायलटने “तू इंजिन का बंद केले?” असा प्रश्न विचारला, त्यावर दुसऱ्या पायलटने “मी बंद केले नाही” असे उत्तर दिल्याचे समोर आले आहे.
अधिकृत प्रतिक्रिया नाही-
भारतातील एअरक्राफ्ट अॅक्सिडेंट इन्व्हेस्टिगेशन ब्युरो (AAIB) आणि नागरी उड्डयन मंत्रालयाने या वृत्तावर अद्याप कोणतीही प्रतिक्रिया दिलेली नाही. त्यामुळे या दाव्यांकडे अधिकृत शिक्कामोर्तब नसलेले अनुमान म्हणून पाहिले जात आहे.
संशयाची दिशा-
रिपोर्टमध्ये विमानाचे कमांडर कॅप्टन सुमित सभरवाल यांना मुख्य संशयित म्हणून उल्लेख करण्यात आला आहे. सभरवाल यांचा या अपघातात मृत्यू झाला होता. तथापि, भारतीय पायलट संघटना आणि त्यांच्या कुटुंबीयांनी हे आरोप फेटाळून लावले आहेत. अपघाताची जबाबदारी वैमानिकांवर ढकलण्याचा प्रयत्न होत असल्याचा त्यांचा आरोप आहे. त्यांनी विमान निर्माता कंपनी, एअरलाइन आणि संबंधित तांत्रिक बाबींची सखोल चौकशी करण्याची मागणी केली आहे.
तपासाची दिशा-
डिसेंबर महिन्यात भारतीय तपासकर्त्यांनी वॉशिंग्टन येथे जाऊन ब्लॅक बॉक्समधील माहितीचे विश्लेषण केले होते. विशेषतः कॉकपिट व्हॉइस रेकॉर्डिंगवर लक्ष केंद्रित करण्यात आले होते. तपासात असेही आढळले की, प्रथम डाव्या बाजूचे इंजिन बंद झाले आणि त्यानंतर उजवे इंजिन बंद पडले.
तज्ज्ञांच्या मते, बोईंग ७८७ ड्रीमलाइनर विमानातील दोन्ही इंजिन एकाच वेळी बंद पडण्याची घटना अत्यंत दुर्मिळ आहे आणि ती केवळ अपघाती परिस्थितीत किंवा मानवी हस्तक्षेपामुळेच घडू शकते.
अपघाताची पार्श्वभूमी-
एअर इंडियाचे बोईंग ७८७ ड्रीमलाइनर विमान १२ जून रोजी अहमदाबाद विमानतळावरून उड्डाण घेतल्यानंतर अवघ्या ३२ सेकंदांत कोसळले. विमान मेडिकल हॉस्टेलच्या इमारतीवर आदळले. या दुर्घटनेत एकूण २६० जणांचा मृत्यू झाला. विमानातील २४२ प्रवासी आणि कर्मचाऱ्यांपैकी २४१ जणांचा मृत्यू झाला, तसेच हॉस्टेलमधील १९ जणांचा बळी गेला.
दरम्यान, अंतिम अधिकृत अहवाल जाहीर होईपर्यंत या प्रकरणाबाबत ठोस निष्कर्ष काढणे योग्य नसल्याचे तज्ज्ञांचे मत आहे. या दुर्घटनेमुळे विमान सुरक्षा व्यवस्थेवर पुन्हा एकदा प्रश्नचिन्ह निर्माण झाले आहे.
