नागपूर: केंद्र सरकारच्या ‘पीएम ई-बस’ (PM e-Bus) उपक्रमाअंतर्गत नागपूर महानगरपालिकेला ५० अत्याधुनिक इलेक्ट्रिक बसेस प्राप्त झाल्या आहेत. महानगरपालिका संचालित ‘आपली बस’ सेवेत या पूर्णपणे वातानुकूलित ई-बसेसचा समावेश होणार असून, त्यांचे लोकार्पण उद्या (१४ फेब्रुवारी) व्हिडीओ कॉन्फरन्सद्वारे करण्यात येणार आहे.
या बसेसचे लोकार्पण पंतप्रधान नरेंद्र मोदी यांच्या हस्ते कोराडी आगार येथे होणार आहे. कार्यक्रमास राज्याचे मुख्यमंत्री देवेंद्र फडणवीस, केंद्रीय मंत्री नितीन गडकरी, केंद्रीय मंत्री मनोहर लाल खट्टर, उपमुख्यमंत्री एकनाथ शिंदे, उपमुख्यमंत्री सुनेत्रा पवार तसेच महसूल मंत्री आणि पालकमंत्री चंद्रशेखर बावनकुळे उपस्थित राहणार आहेत.
ग्रीन आणि सस्टेनेबल मोबिलिटीला चालना-
‘पीएम ई-बस’ सेवा ही नागपूरच्या सार्वजनिक वाहतूक व्यवस्थेच्या आधुनिकीकरणाच्या दिशेने महत्त्वाचे पाऊल मानले जात आहे. या बसेसमुळे प्रवाशांचा प्रवास अधिक आरामदायी होणार असून ‘ग्रीन आणि सस्टेनेबल मोबिलिटी’च्या संकल्पनेला गती मिळणार आहे. पहिल्या टप्प्यात ५० बसेस दाखल झाल्या असून त्या सध्या डेपोमध्ये सज्ज आहेत. केंद्र सरकारच्या योजनेनुसार टप्प्याटप्प्याने एकूण १५० बसेस नागपूर शहराच्या सेवेत दाखल होणार आहेत. यामुळे शहरातील कार्बन उत्सर्जनात घट होऊन स्वच्छ व हरित नागपूर मोहिमेला बळ मिळेल.
अत्याधुनिक सुविधांनी सज्ज-
‘पीएम ई-बस’ अंतर्गत मिळालेल्या बसेस ९ मीटर लांबीच्या असून त्यात ‘२५+१’ अशी आसनव्यवस्था आहे. दिव्यांग प्रवाशांसाठी हायड्रोलिक ई-रॅम्पची सुविधा देण्यात आली आहे, ज्यामुळे बसमध्ये चढणे-उतरणे सुलभ होईल. या बसेस केवळ ३० मिनिटांच्या रॅपिड चार्जिंगवर सुमारे २२५ किलोमीटरपर्यंत धावू शकतात. त्यामुळे कार्यक्षम आणि अखंड सेवा देणे शक्य होणार आहे. या ५० ई-बसेस शहरातील ११ महत्त्वाच्या मार्गांवर धावणार असून नागपूरकरांना आधुनिक, पर्यावरणपूरक आणि सुरक्षित प्रवासाचा पर्याय उपलब्ध होणार आहे.
