नाशिक : स्वयंघोषित ज्योतिषी अशोक खरात प्रकरणात नवनवीन धक्कादायक बाबी समोर येत असून पोलिसांनी त्याच्याविरोधात तीन वेगवेगळे गुन्हे नोंदवले आहेत. आक्षेपार्ह व्हिडिओंच्या आधारे महिलांना धमकावून मोठ्या रकमेची खंडणी उकळल्याचे आरोप पुढे आले आहेत. या पार्श्वभूमीवर राज्य सरकारने विशेष तपास पथक (SIT) स्थापन करून चौकशी सुरू केली आहे.
या तपास पथकाच्या प्रमुखपदी महिला आयपीएस अधिकारी तेजस्विनी सातपुते यांची नियुक्ती करण्यात आली आहे. पोलिसांकडे जमा झालेल्या प्राथमिक पुराव्यांच्या आधारे विविध ठिकाणी गुन्हे दाखल करण्यात आले आहेत.
सरकारवाडा पोलीस ठाणे येथे ३५ वर्षीय महिलेवर लैंगिक अत्याचार केल्याची तक्रार नोंदवली गेली आहे. तसेच, आक्षेपार्ह व्हिडिओ व्हायरल करण्याची धमकी देत सुमारे पाच कोटी रुपयांची मागणी केल्याप्रकरणी वावी पोलीस ठाणे येथे गुन्हा दाखल झाला आहे. याशिवाय, आक्षेपार्ह फोटो प्रसारित केल्याप्रकरणी शिर्डी पोलीस ठाणे येथेही प्रकरण नोंदवण्यात आले आहे.
या तिन्ही गुन्ह्यांमध्ये लैंगिक शोषणासोबतच ब्लॅकमेलिंग आणि आर्थिक फसवणुकीचे गंभीर आरोप समोर आले आहेत. नाशिक पोलिसांनी बुधवारी सकाळी खरातला अटक केली असून न्यायालयाने त्याला २४ मार्चपर्यंत पोलीस कोठडी सुनावली आहे.
दरम्यान, कॅनडा कॉर्नर परिसरातील त्याच्या कार्यालयातून जप्त करण्यात आलेल्या पेन ड्राइव्हमध्ये तब्बल ५८ आक्षेपार्ह व्हिडिओ सापडल्याची माहिती समोर आली आहे. हे पुरावे तपासासाठी महत्त्वाचे ठरण्याची शक्यता व्यक्त केली जात आहे.
धार्मिक श्रद्धा आणि तथाकथित दैवी शक्तींचा आधार घेत महिलांना जाळ्यात ओढून त्यांचे शोषण करणे, तसेच त्यानंतर ब्लॅकमेल करून पैसे उकळणे, असा गंभीर आरोप खरातवर ठेवण्यात आला आहे. या प्रकरणामुळे राज्यभरात संताप व्यक्त होत असून तपासाच्या पुढील टप्प्याकडे सर्वांचे लक्ष लागले आहे.
